Da ka suo moto case shim ka NCW halor ka jingshah pynïap u Raja Raghuvanshi bad jah rngai ka Sonam

Shillong, Jylliew 08: Ka National Commission for Women (NCW) ka la sdang ban shim kam da ka suo motu case ha kaba ïadei bad ki kaiphod ne khubor kiba la saphriang kylleng sawdong halor ka jingshah pynïap jong u (L) Raja Raghuvanshi bad ka jingjah rngai jong ka kurim jong u, ka Sonam, ha ka jingwan kai honeymoon sha Meghalaya.
Ha ki kaiphod ki la don ki jingsuba ba ka lah ban dei ka jingjia shah khaïi met jong ka Sonam sha Bangladesh ha kaba kane ka la long kaba sngewkhia bha, kyrpang hadien ba la lap ïa ka jaiñ kaba la khah snam bad ba la don kiba sakhi ba kine ki shi kurim ki la don bad ki briew ki bym lah ban ithuh.
Ka Chairperson NCW ka Vijaya Rahatkar ka la kyntu ïa ka Director General of Police, Meghalaya, ban pynjur ïa ka jingleit wad da kaba pyndonkam da ki tiar kane ka juk mynta, ba kynthup ïa ka jingwad da kaba pyndonkam ïa ka drone (surveillance), nangta ka jingpyndonkam da ki ksew ban wad, bad ki kynhun ba la pyntbit kyrpang ne specialized investigative team.
Ka la kyntu ruh ba dei ban pynlong da ka jingkhmih bniah ha baroh ki liang kiba lah ban leh, bad ka jingai ka kaiphod kaba bniah ba dei ban aiti hapoh ki 3 sngi.
Ha kajuh ka por u Myntri Rangbah ka jylla Madhya Pradesh u Mohan Yadav u la kyrpad ïa ka tnat ki Kam Pohïing ka sorkar pdeng ban aiti noh ïa kane kam sha ka Central Bureau of Investigation (CBI). Ha kawei pat ka liang ka sorkar jylla Meghalaya ka la ong ba kumba ka long mynta kam pat da i donkam ban phah tohkit ha ka CBI, ha kaba u Myntri ka tnat ki Kam Jngohkai ka sorkar jylla u Bah Paul Lyngdoh u la pynpaw ba ki pulit ka jylla bad ka Special Investigation Team (SIT) ki la long kiba la lah ban pynlong ïa ka jingtohkit.
U nongïalam lynti ïa ki (Tour guide) u Albert Pde, u la pynpaw ba u la ïohi ïa u Raja bad ka Sonam ba la synran da ki laingut ki briew ki bym lah ban ithuh tang khyndiat por ha shwa ba u Raja un shah pynïap bad ka jingjah rngai noh ka Sonam.
Haba kaba ïadei bad kane ka jingjia ki pulit ki la ïaibteng ban pynlong ka jingtohkit, ba kynthup ruh ka jingkhmih bniah na ka bynta kano kano ka jingïadei bad kam khaïi briew (human trafficking) ne ka jingjam sha shilliang u pud u sam ka ri. Ka jingjah rngai jong ka Sonam ka la nang pynlong ïa kane ka jingjia kaba phylla shibun kaba ym pat lah ban pynbeit satia.