SHILLONG, Jylliew 15: Ka Meghalaya Arm Wrestling Association ha ka jingïasnohkti lang bad ka Bouncers Association of Meghalaya ryngkat ka jingkyrshan jong ka Dorbar Shnong Mawlai Nongkwar, ka la ïoh ban pynlong ïa ka rynsan ïakop Street Arm Fight, kaba dei ka jingïakhun kti.
ïa kane ka rynsan la pynlong ha Mawlai Nongkwar bad la pynïaid ïa ka jingïalang da u Bah Junestar Kharbuli, uba dei u President jong ka MAWA, ryngkat ka jingïadon lang ki nongkitkam ka Dorbar Shnong ba kynthup ïa u Bah Esekial Mond – Secy. Shnong, Bah Moonstar Rumnong – Rangbah Shnong, Mawlai Nongkwar, samla Samuel Biam bad kiwei pat.
Na ka liang ki nongïalam shnong ki la ai ka jingkhublei kaba kyrpang ïa ki nongïalam jong ka MAWA kiba la lah ban wanrah ïa kane ka rynsan ïakop ha ka shnong jong ki kaba long shi bynta ban sei ïa ka sap ka phong ki samla bad ki rangbah na kane ka shnong ha ka arm wrestling.
Ha kaba ïadei bad kane, na ka liang jong u President ka MAWA, u la pynsngew ba ka thong ka long ban kyntiew ïa kane ka jingïalehkai bad ban ïoh ban jied ïa ki samla bad ki rangbah ba kynsai bad kiba khlaiñ ban mihkhmat ym tang ïa ka District hynrei ïa ka jylla bad ïa ka ri baroh kawei.
Haba phai sha ka jingïakhun, ki rang bad ki thei ba kynsai ki la pyneh triang ïa la ki dohksah ban ïa aireng mano ba khlaiñ ha kane ka ïakhun kti bad kaba itynnad ka long ba wat ki nongshong shnong ki la poi ban sakhi lang ïa kane ka jingïakhun kaba itynnad bad kaba shongshit.
Ha kane ka sngi, ka MAWA bad ka Dorbar Shnong ka la pynkupburom ïa arngut ki rangkysai bad ïa kawei ka samla kynthei kiba la wanrah nam bad burom ïa ka shnong kiba kynthup ïa u samla Pyndapbor Dkhar uba la jop ha ka Overall Mens Bermuda bad uba la ïoh khur ïa ka kyrdan baar ha ka Junior Bodybuilding jong ka SAARC Championship, nangta u bah Alexion Roy Mylliem Umlong uba la khur ïa ka takma rupa ha ka Asian Arm Wrestling Championship 2025, bad ka samla Iamonlang Kharjana kaba dei ka nongshad ba la pawnam bha ha ka Hip Hop India Season 2 bad kaba la ïakhun ruh ha ka RDYS 4x qualified IBS Season 4.
