Shillong, Jylliew 07 : Ka National People’s Youth Front (NPYF) ha ka sngi Balang ka la sam da ka song pisa sha ki nongjop ha ka ïakob thaw bad rwai kum shi bynta ka jingrakhe ïa ka sngi pynneh mariang.
Ki nongrwai ba ïoh ban khur ïa ka song pisa ba 15hajar tyngka dei u Lancaster Mawthoh, katba ïa ka song pisa ba 10hajar tyngka la ïoh da Ïaitreilang Warjri bad ïa ka khusnam ba lai pat kaba long 5hajar tyngka la ïoh da u Fred Malki.
Ïa katei ka song pisa la sam da u Myntri ka tnad Forest, James K Sangma ba dei ruh u MLA ka NPP ha ka jingïalang kaba long ha ophis treikam ka NPP ha ryngkat ka jingdonlang ki nongïalam ka NPYF.
Ha katei ka lympung ïakob thaw bad ruh ban rwai la wan ban shim bynta haduh 34 ngut kiba la pyni lut ïa ka jingtbit jong ki kumno ban pynshai pynsngewthuh ïa ki paidbah halor ka jingkordor jong ka mei mariang.
Na ka liang u Myntri haba kren ha katei ka jingïalang u la ai ka jingïaroh ïa ka NPYF Shillong City kaba la ban pynlong ïa katei ka jingïakob kaba long ka sienjam kaba paka tam ban pynsngewthuh ïa ki nongshong shnong halor ka jingdonkam kyrkieh ban ïada ïa ki sawdong sawkun ha kum kane ka por ba ka jingkylla ka mariang ka jur bha.
