Da ka song pisa ba 6 lak pynkup burom ka Jylla ïa ka samla Rifiness Warjri ba wan kiew ïa u Lum Everest

Shillong, Jylliew 24 : Ka Sorkar Jylla ha ka sngi Ba-ar ka la pynkup burom da ka song pisa kaba 6lak tyngka ïa ka samla Refiness Warjri, ka samla kaba la ïoh ïa ka jingjop ban poi tiap haduh kliar jong u lum Everest ha ka 18tarik Jymmang mynta u snem.
Katkum ka kyrwoh ba la phah da u Commissioner & Secretary ka tnad Sports & Youth Affairs ka sorkar jylla, la pyntip ba 5lak tyngka la ai da u Myntri Rangbah, Conrad K Sangma bad 1lak tyngka pat na ka tnad Sports jongka jylla.
Ïa kane ka jingpynkup burom kaba la donlang naduh u Myntri Rangbah nalor kiwei kiwei ki Myntri sorkar la pynlong ha State Convention Centre ha ka sngi ba ka sorkar jylla ka sam ruh ïa ka bhah sha ki synjuk ïalehkai bapher bapher ha ka ri kiba pynkhreh na ka bynta ka National Games kaban long ha u snem 2027.
Ka samla Rifiness Warjri kaba dang pule mynta ha St. Anthony’s College, Shillong ka la kylla long ka nongkiew lum kaba dang khynnah tam bad ka kynthei kaba lai na ka jylla Meghalaya ban poi sha kliar jong u lum everest uba don ïa ka jingjrong kaba 8,848.86 meter.
Lah ban kdew hangne ba ka samla Refiness Warjri, ka dei tang maka kaba la shim bynta ha katei ka jingïakop kiew ia u lum Everest na ki jylla shatei lam mihngi ka ri India bad ka dei ruh ka samla kaba saw na ka jylla kaba la poi sha kliar jong u lum Mount Everest hadien 3 ngut kiba la kiew ïa u lum Everest na ka jylla ba kynthup ïa ka Gary Jarman Lamare ha u snem 2012, ka Wansuk Myrthong ha u snem 2013 bad ka Dolyne Kharbhih ha u snem 2016.
Ka Samla Rifiness Warjri mynta ha ka rta kaba dang 20 snem ka dei ka samla pule jong ka St. Anthony’s College bad ruh kum ka NCC ha ka 61 Meghalaya Girls Battalion NCC ka jylla Meghalaya.
Ban pynkynmaw, ka dei ha ka 18 tarik u Jylliew 2025 ba kane ka samla ka la lah ban kiew ia une u lum ba jrong tam ha ka pyrthei ha ka jingjngai kaba 8848 metre na sla duriaw ban poi shaduh kliar jong une u lum.
Ka la ong ruh ban kiew ïa ïa u lum Mount Everest kam dei ka kam kaba suk bad ka long kaba shitom bha bad dei tang ka jingdon ïa kata ka thong ha ka mynsiem bad ka jinglen lade ka la ïakhun tyngeh ryngkat ki jingshitom ban poi haduh kliar u lum Everest kaba la long shisha ka jingjop bad ka jingkmen ha ka jingim jongka ban wan rah nam rah burom ïa ka ïing ka sem bad ïa ka jylla hi baroh kawei, ka la ong.
Kum ka khubor ai mynsiem ïa ki khun samla ka jylla lyngba kane ka jingjop, ka Samla Refiness Warjri, ka la ong ba kam don kano kano kaba kin ym lah ban jop ha ka jingim, hynrei dei tang ka jingtrei shitom bad ka jinglen lade ban poi sha ka thong bad kum ki samla ruh ki dei ban don ïa ka thong ha ka jingim khnang ba kin lah ban poi sha ka thong jong ka jingim kaba ki angnud ha ka jingim, ka la bynrap.