Da ka song pisa ba 41.69 lak ai u CM ban ker ïa ka jaka jong ka Sengbah ki Nongshat Nongkhein ha Bañiun

Shillong, Rymphang 26 : U Myntri Rangbah ka Jylla Conrad K Sangma ha ka sngi Palei u la pyntip ba la mynjur ïa ka mang pisa kaba 41.69 lak tyngka na ka bynta ban ker ïa ka jaka jong ka Sengbah ki Nongshat Nongkhein, Hynñiewskum Hynñiewtrep, kaba don ha Baniun Mylliem.
Ïa kane ka song (sanction letter) u Myntri Rangbah u la pyntip ba la ai lyngba ka Chief Minister Special Development Fund ha ka jingkynduh ïa ki ryngkat ka jingdonlang u MLA ka thain, Bah Ronnie V Lyngdoh.
“Nga sngewkmen ban ai bad mynjur ïa ka song pisa ba 41.69 lak na ka Chief Minister Special Development Fund jong nga na ka bynta ban shna ïa ka jingker,” la ong u Myntri Rangbah haba kren ha katei ka jingkynduh bad ki Nongïalam ka Sengbah ki Nongshat Nongkhein.
Ha kajuh ka por pat u Nongai Ktien, Bah D Swer u la ong ba kum ka Sengbah ki Nongshat Nongkhein ki dap da ka jingsngewkmen kaba khraw ba ki la ïoh ïa katei ka jingïarap kaba khraw na u Myntri Rangbah ka jylla na ka bynta ban ïoh ker ïa ka jaka jong ki kaba heh kumba ar akar.
Shuh shuh u la ong ruh ba mynshwa ki la nang pyrkhat ba kane ka sorkar kam ju peit ïa ki hynrei mynta pat ki lap ba kane ka sorkar ba ïalam da ka NPP ka dei tang ma ka, ka sorkar kaba sngewthuh ïa ka jingdonkam bad ka jingthrang jong ki nongshong shnong kiba dei na ki kynhun niam bapher bapher ha ka jylla.
Ha kane ka sngi na ka liang ki Nongïalam ki la kyrpad ruh ïa u Myntri Rangbah ba un wan plie ïa u mawnongrim na ka bynta ban sdang ïa ka jingpyntrei ïa katei ka jingker.
Ha kajuh ka por u MLA ka thain u la pynpaw ka jingsngewnguh ïa ka jingkloi jong u Myntri Rangbah ban ïarap ïa ki bad khlem da pynslem u la phah pynstet ïa ka kam.
“Ngi sngewnguh ïa u Myntri Rangbah bad nga ai khublei ïa u na ka liang jongnga halor ka jingkloi jong u ban ai ïa ka jingdonkam na ka bynta ban ker ïa ka jaka jong phi.”