Nongpoh, Nailar 29: Ka Raid Nongpoh ha ka jingïalam u Lyngdoh ba thymmai, u Bah Linus Lyngdoh ryngkat u Secretary, u Bah S. Syngkli lem bad ki Longsan mansan mynta ka sngi ki la leit kyrpang ban ïa kynduh ïa ki bor pynïaid ka Nomiwel Memorial Secondary School da kaba ki la leit ban noh synñiang da ka song pisa sha katei ka skul shi bynta ban tynrong lem ïa ki jingduna kiba don hapoh katei ka skul.
Kum ban pynkynmaw, kane ka skul Nomiwel Memorial Secondary School, ka dei kaba la seng ha u snem 1994 da ka jingthmu ban ai jingnang jingstad ïa ki heprit ka thaiñ Nongpoh bad kyrpang na ka bynta kito kiba wan na ki longïing baduk bad kane ka skul ka la shakri mynta la bun tylli ki snem ha kaba ka dang donkam shibun ki jingïarap ban pynbit pynbiang bad khamtam ban kyntiew ïa ka pule ka puthi ki heprit.
Dei halor kane ka nongrim, ka Raid Nongpoh mynta ka sngi ha ka sien kaba nyngkong ka la shim ïa ka sienjam ban kyrshan lem ïa ki jingduna jong katei ka skul da kaba la noh synñiang da ka song pisa kaba T. 15 hajar sha katei ka skul khnang ba ki bor pynïaid skul kin ioh ban pyndonkam na ka bynta ki jingdonkam bapher bapher hapoh katei ka skul.
Kane ka jinglah ka Raid ban synñiang ïa katei ka song pisa sha katei ka skul, ka dei ruh hadien ba ka Sport Committee ka Raid Nongpoh dang ha ka 24 tarik u Nailar 2023 ka la pynlong da ka jingïalehkai paralok hapdeng ka Shillong Lajong FC pyrshah ïa ka Raid Nongpoh Sport Club ban pynmih pisa na ka bynta ban ai jingïarap sha kane ka skul ba la seng hi da ka Raid Nongpoh halor ka thong ban ai jingnang jingstad ïa ki heprit kiba wan na ki longïing longsem baduk ba kyrduh.
La sakhi lang ruh ha kane kane ka sngi ba la ai jingïarap sha kane ka skul lyngba ka sport Committee ka Raid Nongpoh da ka jingdon lang u u Bah Lambok Rymbai kum u Chairman bad u Bah Pynshngaiñ Lyngdoh kum u Secretary lem bad kiwei kiwei ki dkhot ryngkat ka jingdon lang ki nonghikai bad ki khynnah skul katei ka skul.
Haba ai jingkren ha kane ka sngi, u Lyngdoh ka Raid Nongpoh, u Bah Linus Lyngdoh u la pynpaw ka jingkmen kaba khraw ba ha ka sien kaba nyngkong ka Raid ka la lah ban leh ei ei na ka bynta ban synñiang sha kane ka skul kaba dei kawei na ka skulk aba la shakri ban kyntiew ïa ka jingnang jingstad hapoh ka thaiñ Nongpoh.
U la ong ruh ba kum ka Raid ka tip ba kane ka skul ka don shibun ki jingduna ban pynïaid shaphrang ïa kane ka skul na ka bynta ban kyntiew ïa ka pule ka puthi ki heprit, hynrei dei ka jinglen lade ki nonghikai ba kane ka skul ka la dang ïaid shaphrang bad kum ka Raid ruh ka sngewnguh bad ka ai ka jingïaroh kaba khraw ba kane ka skul ka la ïaid shaphrang ban kyntiew ïa ka jingnang jingstad ki heprit.
Shuh shuh, u la ong ruh ba ka Raid nangne shakhmat kan dang ïai don ryngkat bad ki bor pynïaid skul na ka bynta ban dang kyntiew ïa ka jingnang jingstad bad ruh ban ïarap ïa shibun ki jingduna bad ban dang kiew shaphrang kane ka skul donkam ka jingïatrei lang naduh ka Raid, ki bor pynïaid skul bad kumjuh ruh wat ka Dorbar Shnong Nongpoh, u la bynrap.
