Da ka snam synñiang ka Duk i Suk Committee sha ka Jowai Civil Hospital Blood Bank

Jowai, Naiwieng, 23: Ka Duk i Suk Committee jong ka Loompyrdi Iongpiah Dorbar Shnong, Jowai ha ka sngi Saitjaiñ ryngkat ka jingïatreilang bad ka Jowai Civil Hospital Blood Bank kala pynlong ïaka Awareness Cum Blood Donation Camp ha Hall jong ka shnong.
Ka thong bad ka jingthmu ba hakhmat jong ka Duk I Suk Committee ban pynlong ïa kane ka prokram, ka long halor ka nongrim ban kyrshanlang bad ban ïarap kylliang ïa ki para briew khlem da don kano kano ka jingsngew ïapher.
Hashwa ban poi ka jingai snem ‘Blood Donation Camp’ na ka liang ki briew ba dei peit na ka tnad Jowai Civil Hospital Blood Bank ki la wan ban pynsngewthuh ha kane ka Awareness Programme bad ban ai jingtip bad ka jingpynshai sha ki nongshong shnong shaphang ka jingdonkam jong ka jingsynñiang snam.
Ha kane ka sngi ka Dr. Ibansara Khyriem, Medical Officer, Jowai Civil Hospital Blood Bank, Panaliar ka la pynshai shaphang ka jingdonkam jong ka jingaisnam ‘Blood Donation’ kaba long ka jingmyntoi ba kyrpang eh ïa kito ki briew kiba ai snam.
Ka Dr. Ibansara Khyriem ka la pynpaw ka jingsngewnguh ïa ka Dorbar Shnong Loompyrdi Iongpiah kaba la shim ïa kane ka bynta ban ïarap ïa ki mynsiem ba kordor kiba donkam kyrkieh ïa ka snam ha ki jaka sumar ba ki don.