Khliehriat, Jymmang, 25: Ka Corporate Social Responsibility jong ka Star Cement Lumshnong, East Jaiñtia Hills District ha ryngkat ka jingïatreilang bad ka Jowai Civil hospital Blood Bank Centre, ha ka sngi Saitjaiñ ka la pynlong ïa ka Blood Donation Camp ha kaba ki don sawphew ar ngut ki nongtrei jong ka Star Cement kiba la ai snam ei.
Ha kane ka prokram la pynlong ha Star Club ha Star Cement Lumshnong.
Ïa ka Blood Donation Camp, ka CSR ka la sdang naduh u snem 2021 bad dang u snem 2024 ka CSR ka la lah ban noh syniang sha ka Jowai Civil hospital Blood Bank Centre haduh 86 unit ka snam bad ka la long ka jingkyrkhu kaba khraw ïa ka hospital lada don ki nongpang kiba donkam kyrkieh ïa ka snam, khamtam kito ki longkmie kiba kha khunlung bad kito kiba mynsaw na ka jingjia ha kano kano ka aksiden.
Haba kren sha ki lad pathai khubor, u A.V.M ka Star Cement Lumshnong u R.V Ramkishore, AVSM-VSM, uba la shongthait na ka kam kum u G.M jong ka HR bad ADM, u la ong ba kane ka jingai snam ei ka dei ka jingnoh syniang kaba khraw sha ka imlang ka sahlang kaban long ka jingmyntoi ïa kiba pang ba shitom kiba donkam ïa ka snam.
U la ong ruh ba ka CSR jong ka Star Cement ka ju ïa don bynta ruh ha kiba bun ki liang ha kaba kyntiew ïa ka imlang ka sahlang ha ki shnong ki thaw.
Ha kane ka sngi la ïa don ryngkat lang ruh u Manager CSR Star Cement, u Kingshok.K. Borah bad ki nongtrei ka CSR.
Ia ka jingshim snam la pyniaid da ka kynhun na Jowai Civil Hospital Blood Bank Centre ba la lamkkhmat da ka Medical and Health Officer Dr. Ibansara Khyriem bad la sam ruh ïa ki syrnot sha baroh kiba la noh synñiang ïa ka snam.
