Da ka snam ai sngewbha ka TULBA sha ka Blood Bank, Nongpoh ban rakhe ïa ka World Blood Donor Day

Nongpoh, Jylliew 19: Ka kynhun jong ki nongñiah thuk thuk bala tip kum ka The Ultimate Legend Biker’s Association, Nongpoh Circle haka sngi Saitjaiñ da ka jingkylluid mynsiem kila leit ban ai sngewbha ïaka snam bala pynlong da ka Ai Jingim Voluntary Blood Donors’ haka jingïatreilang bad ka Blood Bank Nongpoh, kaba dei ruh shibynta ban rakhe ïaka sngi ai snam haka pyrthei ne ka World Blood Donors’ Day.
Ha katei ka jingleit ai snam jong ki nongïalam bad ki dkhot ka TULBA Nongpoh Circle la pynlong ruh ka prokram lyngkot ha Civil Hospital Nongpoh haka jingdonlang u Alpius Dkhar Vice President ka ai Jingim VBDO, Meristell Marbaniang Organising Secretary ka VBDO, Dr. Tariang ba mihkhmat na Blood Bank Nongpoh, ki nongïalam ka TULBA ba kynthup ïa u Samla Mebariskhem Thabah President, Peace Maker Makri Vice President, Habamut Lyngdoh Secretary bad kiwei kiwei.
Haba ai jingkren ha katei ka sngi naka liang kitei ki nongïalam ka Ai Jingim VBDO kila ai ka jingïaroh ïaka seng TULBA kaba la shim ïaka sienjam ban ai sngewbha da ka snam kaba long ka nuksa kaba bha bad ka jingmyntoi ïa kiba bun ki longiing kiba shem jingeh ban ioh snam bad lyngba katei ka snam yn sa lah pat ban pynim ïaki mynsiem briew kiba donkam ïaka snam.
Naka liang ki nongïalam ka TULBA kila pynpaw ba katei ka dei ka sienjam ba kum ka seng kala shim ban rakhe ruh ïaka World Blood Donor Day ban ai sngewbha da ka snam ban pynim ïa kiba bun ki mynsiem kiba donkam snam kyrkieh khamtam haka por ba jia ki jingmynsaw bad kiwei kiwei ki jingpang jingshitom bad lehse lyngba katei ka sienjam ba ka TULBA kala mih shakhmat kan long ruh ka nuksa sha kiba bun ki paidbah kiba don ka mynsiem ban ai sngewbha ïaka snam ba kin leit ban ai sha ki Blood Bank.
U Samla Mebariskhem Thabah kum u President u la ai khublei ruh ïaki dkhot kiba la mih shakhmat ha katei ka sngi ban leit ai ïaki snam jong ki ha Blood Bank Nongpoh ba kin dang ioh ruh ka met kaba koit ba khiah.