Da ka Smart Integrated Checkgate, ai jingmut ka SMC ban ym lait tuh u dewïong shabar jylla

Shillong,Nailur 18 : Ka Single Member Committee kaba la thung da ka Meghalaya High Court ka la ai jingmut ban buh noh da ka smart integrated check gate na ka bynta ban pyntreikam ïa ka standard operating procedure (SOP) ban pynthikna ba u dewiong ba tih beaiñ un ïaid lait na ka jylla Meghalaya.
U Chairman jong ka Committee u Justice BP Katakey ha ka kaiphod (25th interim report) kaba u la ai sha ka Iingbishar u la ong, “Ka Komiti ka ai jingmut ban shim mardor ïa ka rai halor ka jingpyntip ïa katei ka SoP ba la kdew khnang ban khanglad ïa ka jingshalan ïa u dewiong ba la tih beain ha ka Jylla Meghalaya ha ka dur jong ka u dewiong ba la wanrah na shabar ka Jylla Meghalaya sha ka Jylla bad ruh sha kiwei pat ki Jylla bad kumjuh ruh sha Bangladesh lyngba ka Jylla Meghalaya.”
“Ka Committee, namarkata, ka ai jingmut ban wad ïa ki jaka kiba biang ban buh ïa ka smart integrated exist check gate, kaba donkam bha na ka bynta ban pyntreikam ïa ka SoP ba la kdew haneng bad ban pynthikna ba ym don dewiong ba tih beain ha ka Jylla Meghalaya, ban ïaid lait ïa u pud u sam jong ka Jylla Meghalaya,” u la ong.
U Secretary ka tnad Mining bad Geology u la pyntip sha ka Committee halor ka jingpyndep ïa ka SoP na ka bynta ban shalan ïa u dewiong bad kiwei kiwei ki marpoh khyndew na shabar ka Jylla Meghalaya sha Meghalaya bad sha Bangladesh lyngba ka Meghalaya….
Halor ka jingbuh ïa ka smart integrated check-gate ha Borsora, Bagli bad Charragaon, la pyntip sha ka Committee ba ka jaka kaba la jied kham mynshwa bad kaba dei jong ka PWD kaba don ha Nonghyllam, South West Khasi Hills District, la shem da ka kynhun jurip ba kam long kaba biang na ka bynta katei ka jingthmu ban buh ïa ka khyrdop talasi.