Shillong, Risaw, 30: U Chief Executive Member (CEM) ka KHADC, Bah Titos W Chyne ha ka sngi Saitjaiñ u la plie paidbah ïa ka skim umbam umdih na bynta ka shnong Lawsohtun ba la tip kum ka Lawsohtun Drinking Water Supply Scheme kaba la pynïoh lyngba u MDC ka Laban – Mawprem Bah Mitchel Wankhar.
Ïa kane ka skhim umbam la lah ban pynïoh lyngba ka ‘Tied Scheme’ na ka 15th Finance Commission ha ka jinglut kaba long 30 lak tyngka, hynrei namar ka jingduna ka bhah pisa, na ka liang u MDC u la pyndap sa kumba 12 – 15 lak tyngka na kiwei pat ki skhim, na ka bynta ban lah ban pyndep ïa kane ka kam ka ban lah pat ban weng kham bun ka jingeh ha kaba ïadei bad ka jingkyrduh umbam umdih hapoh ka shnong Lawsohtun hi baroh kawei.
Katkum kane ka projek kaba la plie ha ka sngi ka sngi, kan lah ban bsa umbam haduh kumba 1 lak liter eiei ha ka shi sngi sha ki nongshong shnong ka Lawsohtun.
Ha ka jingïalang ba la pynlong ha madan ieng kali kaba don ha Block-6, nalor u CEM la don lang u MDC Bah Mitchel Wankhar, u Rangbah Shnong ka Lawsohtun, u Bah Haribert Rynjah ki nongkitkam shnong, ki nongrep ka thaiñ, ki rangbah ki longkmie, ki samla lem bad ki paid nongshong shnong kiba la tuid da ki spah ngut ban sakhi ïa kane ka sngi sahkynmaw jong ka shnong.
Haba kren ha kane ka sngi u Bah Mitchel u la ong ba kane ka skhim ka dei ka jubab sha kito ki bym ju ïohi ïa ki kam u MDC, da kaba pynpaw ruh ba ia kiba bun ki kam kiba rit kiba u la leh um ju kwah ban pynpaw paidbah palat.
Haba kren kum u kongsan, u CEM Bah Titos Chyne u la kyntu ïa ki nongshong shnong ban sumar ïa kane ka tyllong um, bad kyntu ruh ïa ki paidbah ba ki dei ban pynneh ïa ka ki khlaw ki btap bad ïa ki tyllong um kiba don kylleng namar ka um ka dei ka lad jong ka jingim.
