Shillong, Naitung : U Bah Teiborlang Pathaw, MDC ka Mawlai constituency un wanrah da ka skhim kaba T. 1 klur na District Council ban pynitynnat ïa ka Viewpoint ne jaka peitkai kaba don ha Beadon Falls (Kshaid Sunapani) ha Mawlai Nongkwar.
Kumba shu kdew ka Mawlai Nongkwar ka dei ka shnong kaba lah ban ïohi kyndiang ïa ka Bishop Fall Bad Beadon Falls, kaba ki paidbah ki ju sin ka kshaid Sonapani bad kshaid Umshyrpi.
Kumta haba ïa dei bad kane u Bah Teiborlang Pathaw ula la shimkhia ban wanrah biang sa shisien ïa ka jingitynnad jong kane ka jaka kaba hap ha ka Dong 3-B jong ka Mawlai Nongkwar da kaba pynïoh ïa ka skhim ba T. 1 Klur napoh District Council ban kyntiew ïa ka Tourism ne kam jngohkai ha Mawlai Nongkwar.
Kane ka Skhim kam dei tang ban shna pynitynnad ïa ka View point hynrei ka kynthup ban shna ruh ïa ki Cafeteria, Open Gym, Children Park, Gift Shop, bad ruh ban leh jingker (fencing) ïa kane ka jaka.
Ha kane ka sngi u Bah Teiborlang Pathaw u la ïa jurip lang bad ki nongpynïaid shnong jong ka Mawlai Nongkwar kiba kynthup ïa u Rangbah Shnong bathymmai u Bah Moonstar Rumnong, ki lai ngut ki Deputy Rangbah Rangbah Shnong, ba kynthup ïa u Bah Bankyrshanlang Nongbri, Bah Richard Wahlang, Bah Emerson Shabong, u Secretary Bah Ezekiel S. Mond da ka jingïadon ryngkat ha ka jingïa pynbeit ïa ka plan kumno ban shna ha ka rukom ba itynnad ïa kane ka jaka jngohkai kaba don hapoh shnong bad kiwei kiwei.
Ha kajuh ka por ki nongpynïaid shnong da ka jingkmen ki la pdiang sngewbha ïa kane ka jingthmu babha jong u Bah Teiborlang Pathaw.
Kaba sah mynta kalong satang ban ïa soi ïa ka soskular (agreement) hapdeng ka shnong Nongkwar bad ka District Council, khnang ban ïoh ban pyntrei noh shaid shaid ïa kane ka kam.