Shillong, Nailur 07 : Ka MP barim ka Lok Sabha, ka Agatha K Sangma ka la shah thung kum ka Chairperson ba thymmai jong ka State Commission for Protection of Child Rights (SCPCR) ka jylla.
Katkum ki thymmei khubor na ka sorkar la ong ba ka jingthung ïa ka Agatha kum ka Chairperson ba thymmai ka SCPCR la mynjur da ka kynhun myntri hynne ka sngi.
Lah ruh ruh ban pynkynmaw hangne ba kane ka Chairperson ba thymmai ka Child Rights ka la shah jied nyngkong kum ka MP jong ka Tura ha u snem 2008 hynrei ka la shah rem noh pat ha ka elekshon MP ha u 2024 ha u kyrtong ka Congress, u Saleng A Sangma.
Nalorkata, ka la jop teng ruh ïa ka elekshon MLA ha u snem 2018 na South Tura hynrei ka la ailad noh ïa u hynmen jong ka u Conrad K Sangma ha ka elekshon shiteng samoi hadien ba u la shah jied kum u Myntri Rangbah ka jylla tang khyndiat bnai ba ka la shah jied.
Hynrei hadien kane, tang ha u 2019 ka la shah jied bïang pat kum ka MP ba thymmai ka Tura.
Kumba long mynta ki dkhot ba thymmai ka SCPCR ki kynthup ïa ka Kong Shanon Donna Massar, Kong Yorica Shylla, ka Flabina P Marak, ka MK Marak, ka Tiana TD Areng bad ka Dr. Ibamon Laloo.
Kumban shu kdew, ka SCPCR ka khlem don Chairperson naduh u bnai Rymphang, hadien ba la kut ka samoi treikam jong ka Kong Ïamonlang M Syiem, kaba bat mynta kum ka Chairperson jong ka Meghalaya State Commission for Women (MSCW).
Ka Kong Ïamon Syiem ka la shah thung nyngkong eh ha u bnai Nailur 2020 na ka bynta ka samoi treikam kaba lai snem, kaba la kut noh ha u bnai Nohprah 2023. Hadien kane ka sorkar jylla ka la pynjlan ïa ka samoi treikam jong ka tang khyndiat por.
Halor kane ka jingshah jied, na ka liang u MLA barim ka Dadenggre, u James K Sangma uba dei ruh u hynmen jong ka Agatha, u la khublei ïa ka ha kane ka jingshah thung kum ka nongïalam ba thymmai jong ka SCPCR.
“Nga ai ka jingkhublei kaba khraw ïa ka para jong nga, ka Agatha K Sangma, kaba la shah thung kum ka Chairperson jong ka State Commission for Child Rights,” ong u James ha ki rynsan social media.
