Da ka shi kol, rah nam lahduh ka Nongbri Brothers’ FT ha ka SSSFT 2022 ha madan Artificial Turf

Mawkyrwat, Jymmang 15: Ka kynhun ïalehkai jong ka Nongbri Brothers’ (Nongjri) Football Team mynta ka sngi ka la long ka lahduh hadien ba ka la lah ban pynliem noh da shi la nod kol pyrshah ïa ka Se-la-jong Football Team ha ka lympung ïalehkai ba la tip kum ka 1st Sngap Singh Syiem Football Tournament (SSSFT) 2022 kaba la pynïaid da ka HYC Mawkyrwat Circle hapoh madan Artificial Turf, South West Khasi Hills District, Mawkyrwat.
Ha kane ka lympung ïalehkai watla ka la don ka jingpynthut jong u slap uba jur bad da ka jingwan kah jong u lyoh, hynrei ka jingïalehkai hapdeng ka Nongbri Brothers’ (Nongjri) FT bad ka Se-la-jong FT ka la long kaba ïaid beit. Ha ka jingïalehkai jong ka kyllastep ka la long da shisha ka jingïakhun kaba itynnad bha namar ki ‘rangïalehkai wat hapdeng jong u slap ruh ki la ïa pyni ïa la ki jong ki sap ki phong ba ki ki don ha ka rukom ïa pashad bol bad kumjuh ruh ha ka rukom ban ïa pyrshang ban ïa pynkhih jar.
Haba phai ha ka bynta jong ka jingïapyrshang ban thmu ban pynrung ïa ka bol hapoh ka kol, la sakhi ba ka Nongbri Brothers’ FT ka la ïoh kham bun ban ïa ka Se-la-jong FT, hynrei kiba bun pat ki jingpyrshang ki la shu long leh noh ei namar ka bol kam shym la rung hapoh ka kol. Ha kane ka jingïalehkai shwa ban kut ka kyllastep na ka liang ki nongpynïaid ki la hap ban pynsangeh shwa shipor ïa ka jingïaleh namar ka jingwantap u lyoh ha kaba ym lah ban ïohi shuh ïa ka bol bad lad ki ‘rangïalehkai ki ïa ïeng kham pajih na u referee. Namarkata, ka jingïalehkai ha ka kyllastep ka la kut noh da kaba baroh ar kynhun kim shym la ïoh ban ïa pynkhih jar.
Haba wan phai biang ha ka jingïalehkai jong ka kyllamiet ha kaba ka bneng ruh ka la ai lad bad kam shym la don shuh ka jingpynwit, ki ‘rangïalehkai ruh ki la mih ha madan ban ïa pyneh la ki dohksah da kaba thmu ruh ba hapoh ki saw phewsan minit kin ïoh ban pynurlong ïa ka jingthmu, hynrei la paw ba na ka liang ka Nongbri Brothers’ FT ha kane ka kynti la ñion tyngeh ha ka minit kaba 71 bad ïoh syndon ban pynrung ïa ka bol hapoh ka kol lyngba u Shano Tariang ha kaba lyngba kane ka shi kol ki ‘rangïalehkai jong ka Se-la-jong FT ruh kim shym la lah shuh ban pynphai wat haduh kaba kut jong ki minit.
Kumta ha kane ka lympung ïalehkai, ka Nongbri Brothers’ (Nongjri) Football Team ka la long ka lahduh hadien ba ka la pynliem noh da shi la nod kol ïa ka Se-la-jong Football Team.
U kongsan u ba wan ba pynhap pyrda ïa kane ka lympung ïalehkai jong ka 1st Sngap Singh Syiem Football Tournament (SSSFT) 2022 u dei u bah Carness Sohshang, MDC jong ka Mawkyrwat Constituency bad ha ka jingkren ba lyngkot jong u u la pynpaw ka jingkmen ban ïoh ban ïa don bynta lang ha kane ka sngi ban pynkut noh ïa kane ka lympung ïalehkai kynjatbol jong ka 1st Sngap Singh Syiem Football Tournament (SSSFT) 2022 hapdeng ka Nongbri Brother’s (Nongjri) Football Team bad ka Se-la-jong Football Team ha kaba wat hapdeng u slap u ba jur ruh ki la ïoh ban pyndep ïa la ka bynta.
Ha ka jingkren ai mynsiem bad kitbok kitrwiang na ka bynta ki ar tylli ki kynhun u la ong ba ai ba ka jingïakhun jong ki kan pynhun ruh de ïa ki nongpeitkai kiba long ki nongkyrshan jong ki namar ha ka jingïaleh kan don beit ka jingjop bad ka jingshah rem noh. “Ka jingjop ka dei ban pynsngewsarong ïa ki bad ka jingshah rem ruh kam dei ba long ka daw jong ka jingpynsuh mynsiem”, ong u bah Carness.
Ha kajuh ka por u la ai khublei kyrpang ruh na ka bynta ka HYC jong ka Mawkyrwat Circle kiba la ïoh ban pynlong ïa kum kine ki lympung ïalehkai kiba long kumshibynta bad ka lad ban pynïajan ïa ki para nongïalehkai la ka long kiba na ka distrik bad kumjuh kiba nabar ka distrik ruh.
Kiwei pat ki nongkren ki long u bah Kitborlang Nongrem, President jong ka NPPYF, u bah Robertjune Kharjahrin, President rangbah jong ka HYC Central Body.
Kiba ïadonlang ki long naduh u bah W.L. Snaitang, Secretary Shnong Mawkyrwat, u bah Stalyne H. Diengdoh, MCS bad SDO ba la shongthait. Nangta, u bah Y.G. Lyngdoh, Working President jong ka Mawkyrwat District Sports Assocation (MDSA) lem bad kiwei kiwei ki ‘riew rangbah ha ryngkat ki nongkitkam jong ka HYC Mawkyrwat Circle, ki nongpeit kai bad kumjuh ruh ki nongkyrshan jong ki ar tylli ki kynhun.
Ha kane ka sngi la ïoh ruh ban sam ïa ka khusnam sha baroh ar tylli ki kynhun kaba jop bad kaba rem bad kumjuh ruh ïa ka khusnam shimet.