Nongpoh, Nohprah 07: Ka FKJGP Sohkhwai-Umdu Unit kaba dang shu pynskhem ha u snem 2017, mynta ka sngi da ka jingkmen ka la ioh ban plie paidbah noh ïa ka sem ap kali na ka bynta ki paidbah jong ka shnong Sohkhwai kum ka jingai sngewbha khristmas ha kaba kum ki dkhot katei ka Unit ki la trei shitom ban nohsynñiang bad trei pyndep hi ïa katei ka sem ap kali ban lait na ka sngi u slap.
Ïa katei ka sem ap kali la wan ban plie paidbah da u Bah Eldie Newton Lyngdoh General Secretary ka FKJGP sengkmie, haka jingdonlang u Bah Luistar Lyngdoh President ka FKJGP North Khasi Hills District, ki dkhot na ka sengkmie bad North Khasi Hills District, ki nongïalam shnong bad kiwei kiwei.
Ha katei ka juh ka sngi na ka liang ki nongïalam ki la ioh ruh ban pynskhem ïa ki nongïalam ba thymmai jong ka FKJGP Sohkhwai-Umdu Unit hadien ba ka samoi treikam jong ki nongïalam ba rim ka la kut ba la pynskhem syndon da u Bah Eldie Newton Lyngdoh.
Haba kren ha katei ka sngi hadien ka jingdep ban plie ïa katei ka sem ap kali bad ka jingpynbam smai ïa ki nongïalam ba thymmai, u Bah Eldie Newton Lyngdoh u la kyntu ïa kitei ki nongïalam ba thymmai haba ki leh ïa kano kano ka kam ba bha ki dei ban sdang shuwa nala iing bad katei ka jingleh bha jong ki ïa ka shnong Sohkhwai da kaba tei ïa katei ka sem ap kali kan long ka jingmyntoi bad ka jingkyrkhu kaba khraw ïa ki nongshong shnong jong katei ka shnong.
U la ong ruh ba ka FKJGP ka ieng na ka bynta u duk u suk, kiba shem jingeh bad ka ju hikai ruh ïa ki dkhot ban ïaid ha ka lynti kaba beit khlem da pynthohbria lane leh kino kino ki kam kiba pynjah burom ïa ka seng, khamtam ban ïatreilang ha shnong ha thaw naduh ki nongïalam shnong, ki longkmie longkpa ban kyntiew ïa ka jaitbynriew shalor.
