Nongpoh, Naitung 23: Ban khanglad na ka jingbret pathar ïa ki plastic ne ki jaboh sha ka pung Umiam bad sha ka wah Umiam ha Ri Bhoi District, u Deputy Commissioner ka Ri Bhoi, u Arpit Upadhyay u la pynjari syndon da ka section 144 CrPC na ka bynta ban khanglad ïa kitei ki kam leh khlem akor ban pynjaboh ïa ka pung Umiam bad kumjuh ruh ka wah Umiam kaba dei ruh kawei na ka jaka jngohkai pyrthei ha Ri Bhoi.
Kane ka jingpynjari da ka section 144 CrPC ka dei ruh shi bynta ban pyntreikam ïa ka hukum (order) kaba dated 27 June 2022 ba la wan rah ka ïingbishar ba don burom ka Meghalaya High Court halor ka PIL No.10/2019 ban pynkhuid biang ïa ka Pung Umiam ba la ujor pyrshah ïa ka sorkar Meghalaya.
Kane ka jingpynjari da kane ka section lane ka kyndon aiñ ka long ban khang pyrshah naduh ka jingpynjaboh ki riew shimet, ki longing ba don hajan ka pung Umiam, ki karkhana, ki skul, ki hotel, petrol pump ba la khang pyrshah ban pyntuid ïa ki jaboh khamtam ki pastic kiba ktah ïa ka khuid ka suba jong katei ka pung Umiam.
Katkum kane ka kyrwoh ba la phah sha ki lad pathai khubor, na ka liang ka ophis u Deputy Commissioner ka Ri Bhoi, kumba la pynjari da katei ka kyndon aiñ la khang pyrshah ba ym dei ban bret jaboh ne ki plastic sha katei ka pung Umiam bad wat ïa ka wah Umiam ruh kumjuh bad lada lap ïa kino kino kiba ïaleh pyrshah khlem da burom ïa kane ka kyndon aiñ kin shah pynshitom katkum katei ka kyndon ba la pynjari ban ïada ïa ka khuid ka suba jong ka pung Umiam.
