Da ka ‘Science Exhibition’ pynlong ka skul Alpha ban ai mynsiem ïa ki khynnah ban pule Saïan

Nongpoh, Lber, 21: Da ka jingthmu ban pynshlur ïa ki khynnah skul ba kin don ïa kata ka mynsiem kaba thrang ban pule shaphang ka jingstad saïan, ka Alpha English Higher Secondary School, Nongpoh mynta ka sngi ka la pynlong ïa ka, “2nd Annual Science Exhibition” kaba long ruh shi bynta ban rakhe ïa ka National Science Day.
Ïa kane ka Annual Science Exhibition la pynlong ha phyllaw ka Alpha English Higher Secondary School, Nongpoh, ha kaba la shim bynta da ki khynnah pule Class-X bad la sakhi lang ruh da ka jingdon lang kiwei ki khynnah bad ki nonghikai skul na katei ka skul.
Ka Principal ka Alpha English Higher Secondary School, Ka Kong W.K Blah ka la long kum ka kongsan bad la don lang ruh da u Bah Asanlang Wanswet, uba dei u nonghikai ïa ka subject Physics bad ruh kiwei kiwei ki nonghikai ïa ka subject Science.
Lyngba jong kane ka Annual Science Exhibition, ki khynnah skul ki la ïoh lad ban sei madan ïa ki model bapher bapher, kiba dei shaphang ka jingstad saïan bad ruh ki khynnah ki la ai jingpynshai ruh halor kita ki Model kiba ki la shna kyrpang ban pyni paidbah ha kane ka jingïapyni sap kiba dei shaphang ka jingstad saïan.
Haba ai jingkren ruh ha kane ka sngi, ka Kong W.K Blah kum ka Principal ka la pynpaw ïa ka mynsiem jong ka jingkmen ban ïohi, ba ki khynnah ki don ïa ka mynsiem jong ka jingrhem ban tip shaphang ki jingstad saïan bad lyngba ka jingbuh ïa ki Model bapher bapher ka la ai jingmyntoi ïa ki khynnah ban tip kham bha shaphang ka jingstad saïan.
Shuh shuh, ka la bynrap ruh da kaba ong, ka daw kaba la pynlong ïa ka skul ban pynlong ïa kane ka Annual Science exhibition, ka long ban pynshlur ïa ki khynnah pule ban phai khmat sha ka jingstad saïan bad kane ka jingpynlong ïa kane ka jingïakop pyni paidbah ïa ki sap bapher bapher ka ai jingmyntoi ruh shibun ïa ki khynnah ba kin dang don mynsiem ha kaba pule shaphang ka jingstad saïan, ka la bynrap.