Shillong, Nohprah 10 : U Myntri Rangbah ka Jylla, Conrad K Sangma u la pynbna ha ka sngi Balang ba ka sorkar jylla mynta ka la jan dep artad ban pynbeit lut ïa ki jingdonkam baroh na ka bynta ban pyntreikam noh da ka rukom siew tulop kaba thymmai ïa ki palat 20,000 ngut ki nonghikai Adhoc bad ki nonghikai SSA.
Haba kren ïa kane ha ka jingïalang rakhe Platinum Jubilee jong ka Umphyrnai Presbyterian LP School u Myntri Rangbah u ong ruh ba katei ka rukom siew tulop kaba la pynbeit thymmai kan wanrah ka jingskhem, ka jingshai halor ka rukom kiew tulop bad ka jingshngain na ka bynta ka lawei jong ki nonghikai.
Shuh shuh u la ong ba ka sorkar ka pynlut kumba 1200 klur tyngka man u snem na bynta ka grant-in-aid na bynta ki skul bad college ba hap ha ka deficit bad adhoc da kaba ong ba kane ka long kum ka jingpynlut na ka bynta ka imlang sahlang.
U Myntri Rangbah u la kdew ruh ïa bun ki jingeh kiba ktah ïa ka kyrdan jong ki nonghikai bad ong ba bun ki nonghikai kiba khlem kot ïa ka kyrdan ba la buh ha ka ri ne ka National Norms hynrei ki la ïakhun tyngeh ban pyndep ïa kine ki kyrdan ba la buh kaba la urlong da ka jingkyrshan jong ka sorkar.
Katkum ka jingong jong u, ka Meghalaya ka la don kumba 25 tylli ki synjuk nonghikai kiba mihkhmat na ki kyrdan bapher bapher kaba la wanrah ka jingeh kaba khraw ban pynbeit pynryntih ïa ka rukom treikam.
