Shillong, Nohprah 22: Ka North Eastern Indira Gandhi Regional Institute of Health and Allied Sciences (NEIGRIHMS), Shillong, ka la pynlong ïa ka Road Safety Seminar kaba thmu ban kyntiew ïa ka jingsngewthuh paidbah halor ka jingkiew jong ki jingjia aksiden kali ha ki surok, khamtam eh ha ka thaiñ shatei lammihngi jong ka Ri.
Haba ai jingkren ha kane ka jingïalang u Prof. Dr. B. K. S. Sanjay uba la ïoh ïa ka khusnam Padma Shri uba long u President ka AIIMS Guwahati bad uba dei ruh u nongbat ïa ka Guinness World Record u la pynpaw ka jingsngewkhia kaba jur halor ka jingkiew ki jingjia aksiden ha ki surok ha ka ri, kaba kynthup ïa ka Jylla Meghalaya.
U la ban jur ba haduh 90% na ki jingjia aksiden ha surok ki mih na ka jingbym shimkhia jong ki briew bad kiba lah ban ïada shibun. “Ka jingniah kali kulmar ka long ka daw kaba kongsan kaba pynlong ïa kane ka jingjia”, la ong u Prof. Sanjay. “Ka dei ka jingeh ha ka jinglong kaba lah ban pynbeit lyngba ka jingpynsngewthuh, jingai jinghikai, bad ka jingbud ryntih ïa ki kyndon ba ïadei bad ka jingniah kali.” U la ong ba ka jingïap ha ki jingjia aksiden ha ki surok ha jylla Meghalaya ka kham bun ban ïa ka jingïap ha ka ri baroh kawei, wat ka la tam ïa ki katto katne kiwei pat ki jylla rilum, bad u la kdew ïa ki jingjia kiba bun kiba la jia dang shen bad ban jur ïa ka jingdonkam kyrkieh ïa ki lad jingïada.
U Prof. Sanjay u la kyntu ïa ki paidbah bad ki bor ba dei peit ban leh da kaba tyngeh. “Ka jingbud ryntih ïa ki kyndon pynïaid kali, ka jingñiah kali kaba don ka jingkitkhlieh, ka jingpynkhlaiñ ïa ka jingai jinghikai shaphang ki kam niah kali, ki prokram ai jinghikai, bad ka jingpyntreikam pyrkhing ïa ki aiñ ba ïadei bad ka jingshngaiñ ha ki surok ki long kiba kongsan ban ïada ïa ka jingim jong ki briew,” u la ong.
U nongïakhih na ka bynta ka jingshngaiñ ha surok bad u orthopaedic surgeon Dr. Gaurav Sanjay u la ai jngkren ha ka seminar, ha kaba u la ban jur shaphang ki jingmynsaw. U la ban jur ba ki sienjam kiba suk kum ka jingdeng ïa ki helmet bad ka jingpyndait ïa ki seat belt ki lah ban pynduna shibun ka jingma bad ka jingjur jong ka jingmynsaw.
U Prof. Sanjay u la pynkut da kaba ai khublei ïa ki bor pynïaid jong ka NEIGRIHMS khamtam ïa u Prof. Bhaskar Borgohain, Head of the Department of Orthopaedics, bad Prof. Star Palana ka Department of Community Medicine, NEIGRIHMS, kiba la ai ka rynsan ban ïasam ïa ki jingmut halor ka jingshngaiñ ha ki surok.
