Da ka Readington Award, kynmaw burom ïa ka lyngkhuh sngi ïap u nongseng ïa u Mawphor

Shillong, Jylliew 10: Ka ophis Mawphor mynta ka sngi, ka la rakhe kynmaw burom ïa ka lyngkhuh dap snem ba shi snem ka jingkhlad noh u nongseng, u (L) Bah Readington M. Marweiñ.
Ha kane ka jingrakhe la sam ruh ïa ka khusnam Readingdon Award kaba nyngkong sha u Bah Davin Kharsyntiew, u nongdie kot khubor ba la 82 snem ka rta bad uba long ruh u nongdie kot khubor bala slem bha ha ka jylla. Ka khusnam, ka kynthup ïaka pisa, ka memento bad ka jaiñryndia.
Ïa kane ka jingrakhe la pynlong ha Mawïong rim ha ïing jong i Bah Readington, ha kaba la ïadon lang ruh ki nongmihkhmat na ka Meghalaya Editors and Publishers Association(MEPA) ki nongdie kot khubor, ki nongtrei Mawphor bad Highland Post, ki nonghikai ka Mari Bon Marweiñ Memorial School ryngkat kiba haïing hasem.
Ïa ka jingïalang la pynïaid da u Bah DL Siangshai, Editor Mawphor bad la ïoh jingkren na u Bah RM Shabong, President ka MEPA, Bah P. Sohkhlet , Joint Editor Mawphor kiba la pynkynmaw ïa ka jingtrei ba radbah jong i Bah Readington ha ka jingshakri ïa ki paidbah lyngba ka kam pathai khubor bad kumjuh ru ka jingshakri lyngba kiwei pat ki kam ba i la trei.
Ha shuwa jong kane, ka la don ka jingleit buh syntiew ha ka jaka tep kaba don ha u lum jingtep ka Balang Presbyterian Mawïongrim.
Ha ka por janmiet pat ka Balang Presbyterian Mawïong rim ka la pynlong ïa ka jingïaseng kynmaw burom ïa i Bah Marweiñ, iba long u Rangbah Balang jong ka Balang haduh ka por ba i khlad.