Shillong, Naitung 16: Ka tnat Animal Husbandry and Veterinary ka Sorkar Meghalaya kala ïoh jingmynjur lane ka No Objection Certificate ban tei ïaka Quarantine Health Check Gate ha Ribhoi District na ka bynta ban eksamin ïa ki mrad kiba wan kit shapoh ka jylla.
ïa kane la pyntip da u president ka All Meghalaya Poultry Farmers Association (AMPFA) Bah Daminot Sylliang hadien ka jingïakynduh ia u Myntri ka tnat Animal Husbandry u Bah AL Hek.
Haba kren sha ki lad pathai khubor, u Bah Daminot ula ïathuh ba kat kum ka jingïakren bad u Myntri, ïaka Health Check Gate yn tei ha Toll Gate 20 Mer Ribhoi District haka jinglut kumba T. 13 klur.
“Ka seng naduh ki por ba mynshwa kala dep buh daki dorkhas ban tei noh daka Quarantine Health Check Gate haki thaiñ khappud ka Meghalaya-Assam ban eksamin ïa ki mrad hashuwa ban pynpoi sha Meghalaya” pyntip u Bah Daminot.
U Bah Daminot ula kam ba kane ka jingdawa kadei ban pynthikna ba ki mrad ba pynpoi sha Meghalaya ban bam doh ki paidbah, ki long kiba koit ba khiah.
“Ngi dap daka jingkmen baka Sorkar kala dep ban thied ïaka jaka bad kala ïoh jingmynjur ïaka song pisa ban tei ïaka Health Check Gate” ula ong.
Nalor kane u Bah Daminot ula ïathuh baka AMPFA kala dawa ruh na u Myntri ka tnat Animal Husbandry, ban pynmih daka Mission naka bynta ban ïarap ïaki nongri syiar jong ka Jylla.
“ïa kiba ri sniang, ka Sorkar ka pynmih daka ‘Piggery Mission’ ïaki ri Masi daka ‘Milk Mission’ bad ïaki ba ri dohkha daka ‘Aquaculture Mission’ hynrei haduh mynta ka Sorkar Jylla kam shym la pyntreikam ïaka Mission naka bynta ki nongri Syiar” ula ong.
U president ka AMPFA ula ïathuh ba tang ha Ri-bhoi district, donkam palat 50,000 tylli ki khun syiar ïa ki nongri syiar ki hap thied na sha bar ka Jylla.
Ula ong baka Jylla ka don ka jaka pynkha khun syiar lane ka Hatchery jong ka Sorkar Jylla ha Kyrdem Kulai Ri-bhoi district hynrei kane kam dei jong ki syiar pham.
“Nalor baka Jylla kam lah ban pynmih syiar kham bun bad ka hap thied khun syiar na sha bar ka Jylla, ki nongri syiar ki hap ruh ban thied ki dawai, ki jingbam syiar bad teng teng, wat ïaki Doctor hap phah wan na sha bar ka Jylla” ula ong.
