Nongpoh, Nailar 02: Kum shibynta ban ai rynsan ïa ki briew kiba don jingduna ha ki dkhot met ban pyni ïa ka sap ka phong jong ki ha ki kam shad, kam rwai, ki kam ak drama bad kumjuh ruh ban nang pynshlur ïa ki ha kiwei kiwei ki kam, na ka liang ka Composite Regional Centre for Skill Development, Rehabilitation and Empowerment of Person With Disabilities (Divyangjan) CRCSRE, Shillong Meghalaya mynta ka sngi ka la pynlong ïa ka Purple Fair for Divyangjan kaba dei ruh ka sien kaba nyngkong eh hapoh ka jylla bad ïa katei ka prokram la pynlong ha Parish Hall Nongpoh.
Ïa katei ka program la ïa snohkti lang daka ophis u Deputy Commissioner ka Ribhoi District lem bad ka ophis jong ka District Social Welfare Officer, Ri-Bhoi District.
Nalor ka jingailad ïa ki briew kiba don ïa ki jingduna ha ki dkhot met ha ki kam shad kam rwai la ai ruh ïa ka rynsan ban pyni ïa ki sap ki phong jong ki ha ki kam shna jingshna ki kam thaiñ bad ki kam saiñ umsoh.
Ha katei ka program la wan ban shimbynta da u Abhilash Baranwal Deputy Commissioner ka Ri-Bhoi, kum u kongsan ha ka jingdonlang ka kong B Rani ADC Ri Bhoi, kong NF Sun DSWO Nongpoh, Ram Sha ka Sahani Director CRCSRE, Shillong, kong Priska Pyngrope kum ka Ambassador Purple Fair lem bad ki 526 kiba la wan ban ïa shimbynta na kylleng ka Ri Bhoi District kiba kynthup ïa 247 ngut ki duna ha ki bor dkhot met, ki nongtrei ka koit khiah bad kiwei kiwei.
Shuh shuh ïa katei ka Purple Fair la wan ruh ban jngoh bad jurip ïa ki dukan pyninam bapher bapher da u Symbud Myntri Rangbah ka jylla u Bah Prestone Tynsong ha kaba la ïa synran lang daki 4 ngut ki MLA jong ka Ribhoi.
U Deputy Commissioner ka Ri-Bhoi u Abhilash Baranwal u la ong ba kam dei tang kaba burom kaba u ïoh ban ïadonglang ha kane ka program hynrei ka long ka jingkmen namar ba kum u DC ka Ri Bhoi u la dep ban bam smai ban pynbit pynbiang ïa ki briew kiba donkam ïa ka jingïarap.
U Deputy Commissioner u la ai ka jingïaroh ïa ka CRCSRE, Shillong kaba pynlong ïa kum kane ka lympung kaba pynlum lang ïa ki kynhun bapher bapher na kylleng ka district ban ïa kren halor ki jingeh bad ban pynïoh ka lad ïa ki briew kiba don jingduna ha ki dkhotmet ne ha bor jingpyrkhat.
