Da ka projek ba 5 klur la wanrah u MLA ban nang kyntiew ïa ka kam jngohkai ha Nongjrong

Shillong, Jylliew 14 : Ka shnong Nongjrong ha Mawkynrew Constituency ka dei kawei ka jaka jngohkai pyrthei kaba la khring bha ïa ki nongwan jngohkai ym tang na ka Ri India hynrei wat na shabar ri ruh kumjuh hynrei nalor ka jingitynnad mariang lypa ki nongshong shnong ha kane ka shnong ki dang angnud ban pynbha shuh shuh ïa ka.
Ki bor pynïaid shnong, ha kaba sdang, ki la shu shna hi ki maw jingkieng, ki jingker bad ki jaka ïeng jngohkai ïa ka Wah Umngot kaba ker pyllun ïa kane ka shnong na ka skhim MGNREGA hynrei tang na kine ki kam barit ka ka khring pynban ïa ki phew hajar ki nongwan jngohkai.
U MLA ka Mawkynrew Constituency, Bah Banteidor Lyngdoh ha ki snem kiba la dep u la pruid dak ban nang kyntiew shuh shuh ïa ki kam jngohkai ha ki jaka jngohkai bapher bapher kiba don ha kane ka Constituency kum ha Laitlum, Syntung kynthup lang ïa ka Nongjrong bad kiwei kiwei.
Na ka bynta ka Nongjrong, ka tnad Tourism ka la pynkhreh ban wanrah da ka Resort ïa kaba yn tei ha ka mang tyngka kaba long 5 klur tyngka nalor kiwei kiwei pat ki jingshna pynitynnad bad halor kane ka phang u Bah Banteidor u la ïalam ïa ki ophisar ka tnad Tourism ban hiar sha katei ka shnong ban ïamir jingmut bad bor shnong ki nongshong shnong ha ka 14 tarik u Jylliew, 2023.
Ha ka jingïalang ïamir jingmut ki bor shnong bad ki nongshong shnong ki la pdiang hun mynsiem ïa katei ka projek kaba la don mynta ha ka bynta ban pyntyllun noh shaid shaid ïa ka ha ryngkat ka thong ban kyntiew ïa ka ïoh ka kot bad thaw ki lad ïoh kam ïoh jam ïa ki khun samla ha katei ka shnong.
Hadien katei ka jingïalang, u Bah Banteidor u la leit ban jurip ïa ka jaka leit bar kaba dang shna bha kaba don hajan ka jaka jngohkai bad kumjuh ka jingtei kaba dang ïaid sha khmat na ka bynta ka Nongjrong Sub-Centre.
Haba kren sha ki lad pathai khubor, u Bah Banteidor u la ong, “Ka kam jngohkai pyrthei ka dei kawei pat ka lad ka lynti ban kyntiew ïa ka ïoh ka kot ki nongshong shnong kane ka shnong kaba la paw bha bad tip lut da ka pyrthei hi baroh kawei”.
“Ka jingwan shane ka long namar ka jingthmu ban shna ïa ka Resort bad ban ai jinghikai ïa ki khun samla ban tip ïa ki jingmyntoi ki ban ïoh na ka jingkyntiew ïa ka kam jngohkai”, u la ong da kaba bynrap ba kane ka shnong kan dei ka nuksa kaba biang tam na ki jaka jngohkai ha ka Jylla da ka jingïatreilang bad ki bor shnong bad ki nongshong shnong hi.
U la ong ïa mynta ki nongshong shnong ki la buh ïa ki Homestay hynrei na ka jingwan tuid bun ki nongwan jngohkai ki dang kwah shuh ban shna kham bun.
Na ka liang u Bah Pynshai Synjri, Sordar ka Nongjrong u la ong ba ki samla na shnong ki bun ki la pyndep jingpule bad kim ïoh kam satia. “Ki don ki khynnah shnong kiba la shim kam kum ki tourist guide bad bun na ki hi ki sngewthuh ba ka long ka jingkyrkhu na ka kam jngohkai ‘, u la ong.
Da kaba kdew ba ki nongshong shnong ki dang shaniah ha ka kam rep, u la ong ba u angnud ba ka kam jngohkai ha ryngkat ka kam rep lane ka Agro-Tourism kan treikam lang. U la ai khublei ïa u MLA uba la shim khia ban thaw lad thaw lynti ban wanrah ïa kane ka projek.
U la ïathuh ba ki nongwan jngohkai kim ju pep shuh ban wan man la ka sngi sha kane ka shnong bad ki samla kin hap ban phai khmat ban shim kabu na kane ka kam jngohkai pyrthei.