Shillong, Nailur 05: Ha ka sngi kyrpang jong ki nonghikai kaba rakhe ha kylleng ka ri, u Myntri Rangbah Duh, u Narendra Modi u la pynbna ïa ka skhim ba thymmai, ïa kaba yn tip kum ka ka PM SHRI Schools (PM ScHools for Rising India).
Katkum ka kywroh ba la pynmih da ka PIB, kane ka dei ka skhim kaba thymmai kaba bei tyngka da ka Sorkar Pdeng ban kyntiew bad pynbha ïa palat 14500 tylli ki skul ha kylleng ka ri da kaba pynkhlaiñ ia ki skul kiba la don lypa napdeng kito kiba pynïaid da ka Sorkar Pdeng, ka Sorkar Jylla bad ki bor Shnong.
Ki skul PM SHRI kin pyni ïa baroh ki bynta ka National Education Policy 2020 bad kin long ki skul kiba ai nuksa ïa kiwei kiwei ki skul kiba don hajan jong ki.
Ka rukom ai jinghikai ha kine ki skul kan long kaba buh nongrim ha ka jingleh experiment, kaba pura, kaba ïasoh, kaba pyndonkam da ki jinglehkai (khamtam ha ki klas ba rit), kaba pynshlur ïa ka jingbuh jingkylli ki khynnah, kaba peit bniah ïa ka jingïoh jingnang jingstad, kaba laitluid bad kaba sngewtynnad.
