Da ka pisa ba 14,070 synñiang ki samla shnong Iooksi Pyllun sha u ma Nehemaya Tyngkan

Jowai, Nailur 18: Ka kynhun jong ki samla ka Shnong Iooksi Pyllun kiba kynthup ïaka Iooksi Iapkhla, Iooksi Priang, Iooksi Umdeinlin, Iooksi Kyanmynsar bad Iooksi Tongkiad ki la ïa lum lang shi jaka ha Community Hall jong ka Iooksi Thlongmoo hynnin ka sngi saitjaiñ naka bynta ban ïa pyrkhat ïaki kam kiba ïadei bad ka jingthmu ïakhun Elekshon jong u ma Nehemaya Tyngkan.
Lah ban pynkynmaw ba u ma Nehimaya Tyngkan udei u kyrtong jong ka Congress uba ïakhun la arsien kynthih mynta na katei ka juh ka party napoh 4 Mowkaiaw Constituency.
Haka jingïalang jong ki Samla ka Shnong Iooksi Pyllun mynta ka sngi, la ïoh ban kren na shibun ki samla ka shnong kiba la ai jingmut bad bad kiba la kyntu ïaki paidbah ban kyrshan tylli ïa u ma Nehimaya Tyngkan khnang ba ka jingthmu bad jingangnud jong u ban shakri ïaki paidbah kan urlong.
Ha kane ka sngi ki samla ki la lum synñiang ruh para samla kaba kot ka bor da kaba thmu ban ïa kyrshan lang ïaka kam ïakhun Elekshon jong u ma Nehemaya Tyngkan.
Naka liang u ma Nangaibormi Sutnga ula ong ba ka jingkylla haka synshar hi kan wan tang lada ki paidbah nongthep vote ki sngewthuh ïaka jingdonkam ka jingsynshar kaba khuid kaba suba dakaba kiar shwa ïalade naka jingshah thied tad dor haki bor ka pisa.
“hooid ymlah ban len ba katba dang ïaid ki por ka jingïakhun elekshon ka nang rem dor nang remdor bad kan sa poi ka por ba u kyrtong uba thrang shisha ban shakri ïaki paidbah un nym nud ïa aireng shuh tang namar ba u wan naka longïing baduk, kumta yn nym don jaka ïa uba duk haka kam saiñ hima sima” la ong u ma Nangaibormi Sutnga. Haba ai khublei ïaki samla ka shnong Iooksi Pyllun halor ka jingïa noh syññiang jong ki sha u ma Nehemaya Tyngkan u ma Sutnga ula ong ba lada baroh ki nongshong shnong ki don ïaka mynsiem kaba kum kane, khlempep yn sa ïoh ïaka jingsynshar kaba khuid kaba khlem da leh shilliang khmat bad lehbor.
Ha kane ka sngi la aiti ïaka pisa kaba haduh 14,070 tyngka sha u ma Nehemaya Tyngkan da u samla Lovelast Lathong u shongknor ka kynhun ki Samla ka Shnong Iooksi Pyllun.