Da ka phlim lyngkot pynmih ki Pulit Ri Bhoi ban phikir halor ki kam ñiah kali

Nongpoh, Jymmang 11: Ban pynsngewthuh bad ban pynshai sha ki paidbah ka dong Ri Bhoi halor ka jingdonkam ban bud ïa ki kyndon ñiah kali ban ïada na ki jingjia ba sngewsih, ka ophis u Superintendent of Police Ri Bhoi ka la shna da kawei ka phlim lyngkot ba la ai kyrteng, ‘Phikir’ da ka jingthmu ban pynsngewthuh ïa ki paidbah ba ki hap ban phikir bad ban bud ïa ki kyndon ñiah kali ha Ri Bhoi District.
Ka tnad Pulit na Ri Bhoi ka la shna ïa kane ka phlim lyngkor shi bynta ban pyntreikam ruh katkum ka Central Motor Vehicle Rules 1989 ba ki don ki kyndon ba ki paidbah ki hap ban bud ne pyntreikam haba ki ñiah kali khnang ban lait na ka jingjia ba sngewsih kum ka jingaksiden bad ka jingïap briew.
Ïa kane ka phlim lyngkot ba la ai kyrteng, ‘Phikir” la pynlait paidbah da u Superintendent of Police ka Ri Bhoi, u Giri Prasad ha ka Sngi Baar ha ka ophis treikam jong u ha Nongpoh ha ka Youtube Channel ba la ai kyrteng, ‘LS Syiemlieh Production’
Ha kane ka phlim lyngkot la wan shim bynta ruh da ki tyngshop ba kham paw ka jylla, ba kynthup ïa u Bah Rijied Khymdeit, u Bah Lansius Syiemlieh bad kynthup ruh ki Pulit Ophisar ka Ri Bhoi kiba la ak ha kane ka phlim shi bynta ban pynshai sha ki paidbah halor ki kyndon ba pyntreikam na ka bynta ki kam ñiah kali la ka dei ka kali ki riew shiemt ne ki kali ba kamai paidbah.
Kumba la pynpaw ruh da u SP ka Ri Bhoi, u Giri Prasad ka daw kaba la pynlong ïa ka tnad Pulit na Ri Bhoi ryngkat ka Traffic Branch na Nongpoh ban shna ïa kane ka phlim, ka long ban ai jinghikai sha ki paidbah lada ki peit ïa kane ka kali ki hap ban bud ïa ki kyndon jong ka traffic rule lane kata ka Central Vehicle rules 1989 khnang ban nym mih ki jingjia ba sngewsih.
U Giri Prasad u la pynpaw ruh ba tang na ka daw ka jingbym bud ïa ki kyndon ñiah kali bun ki mynsiem ba kordor ki la duh noh ïa ka jingim bad ban pynduna ïa kane ka jingjia ba sngewsih na ka jingñiah Kali khlem akor la pynmih ïa kane ka phlim da kajingthmu ba ki paidbah kin tip ïa ki kyndon kumno ban niah kali.
La kren shai ruh ha kane ka phlim naduh ki Nongñiah Kali shimet ne paidbah ki hap ban deng ïa ki Seat Belt bad kim dei ruh ban dih kyiad ne pyndonkam mobile ha ka por ba ki nang ñiah kali namar kane bunsien ka wan rah ïa ki jingjia ba sngewsih ha ka por ba kim poi pyrkhat.
Kynthup ruh na ka bynta ki Kali ar Shaka la btah ruh ïa ki ba ki hap ban deng ïa ki Helmet kiba long ki jingïada ha ka por ba ki niah ïa ki Kali, namar bunsien kane ruh ka wan jia ka jingjia ba sgewsih na ka daw ba kim deng ïa ki Helmet bad kim bud ïa ki kyn don ñiah Kali, ong u SP.
Kumba la ai jingsneng ha kane ka phlim ba lyngkot, kito hi kiba pynkhein ain kin mad ym tang ïa ka jingshah dain kuna katkum ka kyndon aiñ bad busien ruh ka mih ka jingmynsaw bad ka jingïap na ka daw ba kaim bud ïa ki kyndon ba la buh da ka sorkar ha kaba ïa dei bad ka kam ñiah Kali, u la bynrap.