Nongpoh, Rymphang 19 : Ka seng Federation of Khasi Jaintia and Garo People (FKJGP) North Khasi Hills District mynta ka sngi kala rai ban pynlong da ka Peace Rally ha Nongpoh halor ka jingpynsahteng bad ka jingpynslem jong ka sorkar ban pynbeit ïa u pud u sam.
Haba kren sha ki lad pathai khubor mynta ka janmiet u Bah Luistar Lyngdoh President ka FKJGP u la ong ba kum ka seng kala shim ïaka sienjam ban pynlong daka jingïakhih ba jai jai ban sa pynlong lashai ka 20 tarik Rymphang ha Nongpoh namar ka sorkar haduh mynta kam shimkhia ban ïakren bad ban pynbeit noh ïa u pud u sam jong ka jylla.
Ïa kane ka peace rally la rai ban sdang naduh ka por 1 baje noh phai sngi bad yn sdang da ka jingïaid kjat naduh ophis u DTO ha Nongpoh bad pynkut pat ha madan Pahamsyiem, bud pat sa ka jingïalang lyngkot ha kaba ki nongïalam ka seng kin sa ai jingkren ryngkat kiwei de ki nongïalam jong ki kynhun seng bhalang.
Namarkata naka liang ka seng ka khot ka wer ïa baroh ki dkhot ka seng bad kumjuh ruh ki paidbah ban ïa mih ryntih ha kane ka sngi naka bynta ban dawa bad ban pynbor ïaka sorkar ba ka dei ban shimkhia noh mardor ban ïakren bad ka Assam ban pynbeit noh ïa u pud u sam hadien ba bun naki paidbah kiba sah khappud ki mad jingeh bad ki jingsyier namar ka jingbym thikna u pud u sam.
