Da ka pakhang surok, maham ka HNYF ïa ki trok kiba ïaid na surok Umpung sha Weiloi

Mawkyrwat, Naitung, 02: Ka Hynñiewtrep National Youths Front (HNYF) jong ka Southern Border Area ka la leit jurip biang sa shisien ïa ka surok ba dei ïaid na Weiloi – Trongpleng bad sha Umpung bad kumjuh ruh shaduh sha shnong Balat ha kaba ka la lap ba kane ka surok ka la sniew shaba palat bad i donkam ban marmot mardor khnang ba kan pynsuk ha ka leit ka wan jong ki paidbah.
Ïa ka jingleit jurip la lamkhmat da u bah Kyllang S. Thongni, President jong ka Hynñiewtrep National Youths Front (HNYF), Southern Border Area bad u bah Drimshon Mawlein, Secretary Hynñiewtrep National Youths Front (HNYF), Southern Border Area.
Namarkata, ki nongïalam jong ka HNYF haba kren ha ki lad pathai khubor ki la ong ba kane ka dei ka sien jam ba ar ba kum ka seng ka don hapdeng jong ka jingïakhun ban pynkohnguh ïa ka Sorkar ba kan mang pisa na ka bynta ka surok Weiloi shaduh sha shnong Balat, Umpung khamtam ïa ka surok naduh Umpung haduh Trongleng kaba la sniew sha ba palat.
Ha ka jingleit jurip jong ka HNYF, ka la pynlong rih ka jingpakhang syndon ïa ka surok kaba dei ïaid na Umpung sha Weiloi da ka ba buh ruh da ka Gate ha kaba kim shah shuh ïa ki trok kiba kit ïa ki mar kiba khia bad maham ruh ba kim dei shuh ban ïaid na kane ka surok namar ka pynjulor ïa surok.
“Ngi maham tyngeh ïa ki trok kiba ïaleh pyrshah kiba dang ïaid na kane ka surok na Umpung sha Weiloi lada jia ei ei kin shim hi ïa ka jingkitkhlieh”, ong u bah Kyllang S. Thongni.
Shuh shuh la ong ruh ba kane kam dei ka jingbishni ïano ïano hynrei ka seng ka leh na ka bynta ban wanrah ïa ka jingpynbha ïa kane ka surok khnang ba ki paidbah kin nym ïa kynduh jingeh ha ka ïaid ka ïeng.