Nongpoh, Nailar 23: Kum uwei u rangbah ba don ka jingkitkhlieh khamtam naka bynta ka jingbit jingbiang jong ka shnong ka thaw, u Bah Nebitson Kharlyngngai u ba dei u nongshong ka Umden Umsaitprah mynta ka sngi u la aiti syndon da ka ophis treikam ba paka jong u Rangbah Shnong ha katei ka shnong kumba haduh mynta ka shnong kam don satia ïaka ophis treikam kaba bit ba biang, ïa kaba la tei haka jinglut kumba 1.50 lakh. Ha katei ka sngi ka jingplie ïa katei ka jaka treikam jong u Rangbah Shnong la sakhi ruh da ka jingdonlang u Bah Justine Kharbuki Rangbah Shnong ka Umden Umsaitprah, u Bah Apbor Nongrum uwei naki samla rangbah katei ka shnong, ki longkmie longkpa ki khun samla bad kiwei kiwei ki riew rangbah. Haba kren ha katei ka sngi naka liang u Bah Nebitson Kharlyngngai u la pynpaw ba ka jingai jong u ïa katei ka ophis u Rangbah shnong ka dei namar ba kum ka shnong kam don satia ïaka ophis treikam ba pura jong u Rangbah Shnong.
