Da ka Official Resolution dawa ka HYC ïa ki MLA ban rah hapoh ka ïingdorbar Thawaiñ

Mawkyrwat, ‘Nailar, 03: Ka Hynñiewtrep Youth’s Council (HYC) jong ka South West Khasi Hills District ha ka kyrwoh khubor na u bah Arbok Kharjahrin, President, HYC, South West Khasi Hills District ki la buh ka jingdawa na ki MLA ka South West Khasi Hills District ba kin leit rah da ka ‘Official Resolution’ (OR) ha Ïing Dorbar Thawaiñ ban pynkut noh syndon ïa ka jingthmu ban tih ïa u marpoh khyndew ne uranium jong ka Uranium Corporation of India (UCIL).
Shuh shuh u la ong ruh ba ka HYC, South West Khasi Hills District ka dap da ka jingsngewkhia ban ïohi ba ka sorkar India lyngba ka UCIL ka dang don ka jingthmu ban tih ïa u marpohkhydew u ba don hapoh jong ka South West Khasi Hills District. Namarkata, ka seng ka pynrem jur ïa ka sorkar India bad ïa ka UCIL kiba watla ki paidbah ka Jylla ki la ju pynpaw ïa ka jingpyrshah ban tih ïa u, hynrei ka sorkar India ha ryngkat ka UCIL pat ki dang thmu ban tih beit ïa u uranium. “Kane ka jingleh bym suidñiew ka UCIL bad ka sorkar India ka wan rah ïa ka jingshong syier, ka pynklumar jingmut ïa ki paidbah ka dong ka thaiñ, ka buh ïa ki paidbah ha ka jingma bad ka long ka jingthom bor ïa ki paidbah”, ong ka kyrwoh na u President ka HYC.
Ka HYC South West Khasi Hills District ka pynpaw shai ba ka seng ha ryngkat ki paidbah da lei lei ruh em kin nym ailad ïa ka sorkar India bad ïa ka UCIL ba kin wan tih ïa u Uranium hapoh ka Jylla.
Kumta, ka seng haba ïohi ha ki khubor ba ki ar ngut ki MLA jong ka Mawkyrwat Constituency, u bah Renikton Lyngdoh Tongkhar bad u bah Pius Marwein, MLA jong ka Ranikor Constituency ki la pynpaw ba ki pyrshah ïa ka jingthmu tih ïa u uranium hapoh ka District, kum ka seng ka sngewkmen ba ki la pynpaw ïa ka sur u paidbah jong ka distrik hynrei tang ban pynpaw ha ki khubor kam pat biang, “Ngi dawa pat na kine baroh ar ngut ki MLA ba ki dei ban rah syndon da ka ‘official resolution’ ha Ïing Dorbar Thawaiñ ka Jylla ba baroh ki MLA ka Jylla Meghalaya kiba pyrshah tih ïa u Uranium bad kin rai da kawei ka sur ban dawa na ka sorkar India ba kan sangeh noh mardor ïa ka jingthmu tih ïa u uranium ha ka Jylla bad ba kin khang kyrdep noh ïa baroh ki ophis UCIL ha ka Jylla Meghalaya”, u la ong.
Ha kawei pat ka liang, u Arbok u la ong ruh ba ka seng kan long kaba la kloi ban ïatreilang bad kine ki MLA’s ban ïa pynsngewthuh ïa kiwei ki MLA nabar ka South West Khasi Hills District ba kin kyrshan lada ki MLA napoh ka districk ki mon ban wanrah da ka jingrai ha Ïing Dorbar Thawaiñ.
Ka HYC South West Khasi Hills District ka ai jingmut ruh ïa ka Khasi Hills Autonomous District Council (KHADC) khamtam ïa ki MDC’s ka distrik ba kin wanrah da kajuh ka jingrai ne resolution ha Ïing Dorbar Thawaiñ ka KHADC khang ba ka jingpyrshah tih ïa u Uranium kan nangskhem shuh shuh. Kane ka long ka kyrwoh ba la phah da u bah Arbok Kharjahrin, President, HYC, South West Khasi Hills District.