Da ka NIMHANS 2.0 pynbna ka myntri ha ka mangtyngka ka Sorkar Pdeng

New Delhi, Rymphang 01 : Da kaba phaikhmat sha ka koit ka khiah ha ka bor pyrkhat, ka Myntri ka tnad Platyngka jong ka Sorkar Pdeng ka Nirmala Sitharaman ha ka sngi U Blei ka la pynbna ba kan don noh sa kawei ka National Institute of Mental Health and Neuro Sciences lane NIMHANS ha ki bynta ba shatei jong ka Ri.
Lah ban shu pynkynmaw hangne ba ka NIMHANS ba nyngkong ka don ha Bengaluru.
Haba wanrah ïa ka mangtyngka (Union Budget) na bynta ka snem 2026-27, ka Myntri ka la pynbna ruhba ïa ka National Mental Health Institutes kaba don ha Ranchi (Jharkhand) bad kumjuh ha Tezpur (Assam) yn sa kyntiew noh ïa ki sha ki Regiona Apex Institution lane ki jaka sumar kiba kham heh bad kham paka.
“Ym pat don ki jaka sumar kiba heh ha ka ri na ka bynta kiba shah ktah ha ka bor pyrkhat. Na kata ka daw, ngin sa thaw noh da ka NIMHANS -2 bad ruh ban kyntiew ïa ki jaka sumar bor pyrkhat kiba don ha Ranchi bad Tezpur sha ki Regional Apex Institutions,” ong ka Sitharaman haba wanrah ïa ka Mang Tyngka.
Da kaba kdew ba ki don ki jingjia kiba kyrkieh kiba ktah ïa ki longiing kiba duk bad kiba tlot bor na ka daw ka jinglut kaba ym poi pyrkhat, ka Myntri ka la ong, “Ngin sa pynkhlain bad kyntiew shuh shuh ïa kine ki jaka sumar da 50 persen ha ki distrik hospital da kaba buh ïa ki emergency bad ki trauma centre.”