Shillong, Nailar, 09: Ka Hynñiewtrep Border Dispute Redressal Forum (HBDRF) ha ka sngi Balang ka la pynpaw ba ka kwah ba ïa ka kaphod tohkit jong ka Enquiry Commission ba la thung da ka Sorkar Meghalaya bad ka Sorkar Assam ban tohkit halor ka jingshah siat ïap jong ki hynriew ngut ki briew ha ka shnong Mukroh kaba la jia ha ka 22 tarik u Naiwieng, 2022 dei ban aiti sha ka Central Bureau of Investigation (CBI) lane sha ka National Investigation Agency (NIA).
“Ngi kwah ba ïa ka kaiphod tohkit dei ban aiti sha ki Central Agency jong ka Sorkar Pdeng ki bym don kaj jingïashah liang la ka long sha ka CBI lane sha ka NIA,” ong u Secretary ka Forum u Bah Thomas Passah ha ka jingïakren bad ki lad pathai khubor.
Ka Sorkar Meghalaya ka la thung ïa ka Enquiry Commission ba la khlieh da u nongbishar ba la shongthait jong ka Ingbishar Meghalaya High Court u Justice T. Vaiphei katba ka Sorkar Assam ruh ka la thung la ka jong ka Enquiry Commission ba la khlieh da ka nongbishar ba la shongthait jong ka Ingbishar Guwahati High Court ka Justice Rumi Kumari Phukan.
Ha ka Lah Sngi u Blei ka Enquiry Commission ba la khlieh da ka nongbishar ba la shongthait jong ka Ingbishar Guwahati High Court ka Justice Rumi Kumari Phukan ka la wan poi ha nongbah Shillong ban lum ïa ki sakhi halor ka jingjia ha ka shnong Mukroh hynrei wat tang uwei ruh na Meghalaya ym don satia uba leit mih hakhmat ka Commission.
Haba pynpaw ka jingsngew lyngngoh ïa ka jingkhot jong ka Enquiry Commission ba la thung da ka Sorkar Assam ïa ki nongai sakhi na ka Jylla Meghalaya, u Bah Chandame Sungoh u la ong, “la lai sien laiwat ka (Enquiry Commission na ka jylla Assam) la khot. Ka Meghalaya ngi ïoh jingtip ba ka la thung la ka jong ka Enquiry Commission bad ki la leh ruh la ka jong ka jingtohkit ba la khlieh da u Justice T. Vaiphei.”
“Na ka liang ka Assam katkum ka jingtip ba la ïoh ka la ai sha ka Sorkar Meghalaya bad ka Sokar Meghalaya kam treh ban ïashim bynta. Ka pynsah ïa ngi ha ka umdum ba kumno kajuh ka jingjia kin don ar tylli ki Enquiry Commisison. Ka Sorkar Assam ngi tip ba kan pynksan beit la ka jong ka nia,” u la ong bad bynrap, “ki briew jong ngi kiba mad ïa ki jingjia, kumno kin ïoh ïa ka hok ba ki dei ban ïoh. Kata ka dei ka jingkylli ba ngi kwah ban buh ïa ka Enquiry Commission. Kam ju don ka rukom ba ar tylli ki Enquiry Commision kin shong bishar ïa kajuh ïa ka kam.”
Haba kynnoh shuh shuh ïa ka Sorkar Assam kan pynksan beit la ka jong ka nia, u Chairman jong ka Forum u la ong, “ha ka jingtokit jong ka Sorkar Assam ki don lai tylli ki daw ba ka pynieng la ka jong ka nia. Nyngkong eh, ngi ïohi ba ka Mukroh ka la shah pynhap hapoh ka Jrikyndeng Police Station, West Karbi Anglong. Kane ka pyni shai kdar ba la kam jubor ïa ka Mukroh sha Assam. Kaba ar, ka jingjia baroh ka dei na ka jingtuh dieng jong ki Khasi-Pnar na Karbi Anglong, Assam. Kaba lai, ka jingshah siat, ka jia tang na ka daw ka jingker kut jong ki paidbah ïa ki Pulit bad ïa ki nongpahara khlaw ka Sorkar Assam da kaba rah ruh ïa ki tiar pynmynsaw bad ban ïada ïalade kim (Pulit) banse ban siat.”
“Kum ka Forum, ngi pynshai sha ka sorkar Assam bad sha ka Sorkar Meghalaya, daleilei hi ka Mukroh bad ka jaka ba la jia (ka jingshah siat) kam hap shuh hapoh ka Jrikyndeng PS, Karbi Anglong, Assam. Lada peit ka jingjia kam hap shuh ha ka jaka ba don ka Forest Check-gate (jong ka tnat Forert ka Sorkar Assam) bad ka dang jngai sa kumba shi kilomitar tam na Mukroh.
“Ngim lah ban len, ka don ka jingkitdieng na Karbi Anglong da ki Khasi-Pnar hynrei ban ong ba ngi kit tuh kam ïahap. Ngim ju tuh, ngi thied ïa ki dieng. Ki dieng kiba la kit ki dei kiba ki briew jong ngi ki thied na ki Karbi,” la ong u Bah Sungoh.
“Halor ka jingkerkut jong ki briew jong ngi ïa ki Pulit Assam ha ka jingshisha kim dei ban kthong, ka jingleh jong ki (Pulit Assam) ka long kaba palat. Ka jingmih ka jingïakynad kam dei na ka jingtuhdieng ne na u pud u sam. Ka daw hi ka dei ka jingdon jong ka Forest Check Gate jong ka Karbi Anglong, Assam. U pud u sam jong ka shnong Mukroh u ïar shaduh ba don ka Forest Check Gate bad kane ka khyrdop sa san bad hynriew kilomitar sha mihngi u pud u sam (jong ka Mukroh) u kut haduh ka jaka ba la khot Motha Siangkwai,” la ïathuh u Bah Sungoh bad bynrap, “hynrei ka Assam ka kam ba tang shu jam ïa ka Forest Check Gate la kynnoh beit ba shu tuh.”
“Ka Forum ka ieng halor ka nongrim bad ka jingshisha lada kumno kumno ki paradoh parasnam kiba la duhei ïa ka jingim ha ki ktang suloi (jong ki Pulit Assam) ki dei ban ïoh ïa ka jingbishar kaba hok. Ka Sorkar Meghalaya ruh kam dei ban shu sngapjar (halor kane ka kam) namar ka jingsngap jar ka long kum ka dak ka jingïamynjur,” la ong shuh shuh u Bah Sungoh.
