Nongpoh, Nohprah 02: Ka longshisha ka jingkmen bad ka jingkyrkhu ïaki paidbah ka thaiñ Byrnihat hadien ba u Bah Sosthenes Sohtun Myntri sorkar jylla ba dei ruh u MLA ka thaiñ mynta ka sngi u la leit ban plie paidbah ïa ka Multi Facility Centre ha Byrnihat Proper.
Ïa katei ka Multi Facility Centre la tei haka jinglut kumba T.60 lakh bala bei tyngka da ka Ministry of Tribal Affairs jong ka sorkar pdeng.
Ha kane ka sngi la sakhi ruh da ka jingdonlang u SC Sadhu Director ka Community and Rural Development, u Abhilash Baranwal, Deputy Commissioner Ri Bhoi, u Bah Eric Dkhar, BDO Umling Block, u Bah Jeslin Syngkli, Rangbah Shnong Byrnihat Proper, ki nongïalam shnong bad riew pawkhmat ka thaiñ Byrnihat.
Haba kren ha kane ka sngi naka liang u Bah Sosthenes Sohtun u la pynpaw ka jingkmen kaba khraw ban iohi ba katei ka project la lah ban pyndep ïaka haka por kaba biang ka ban long ka jingmyntoi ïaki paidbah ka thaiñ Byrnihat ban pyndonkam ïa katei ka building haki kino kino ki jait prokram, ki kam khawai dawai bad kiwei kiwei ki jingdonkam.
Naka liang u Bah Sosthenes u la ai ruh ka jingïaroh ïa u Myntri Rangbah ka jylla u Conrad K Sangma u la shimkhia ban pynurlong ïa katei ka jingangnud jong ki paidbah ban don noh ka Multi Facility Centre ha katei ka thaiñ.
