Da ka mukotduma bai mynraiñ khmat mudui ka tnat Planning pyrshah ïa u Saket Gokhale

Shillong, Nohprah, 10: Ka Meghalayan Age kaba dei ka kompeni kaba hap hapoh ka jingpeit jong ka tnat Planning ka Sorkar Jylla bad ki Heh Ophisar ka Sorkar Jylla, ki la mudui da ka bai mynrain khmat pyrshah ïa u National Spokesperson jong ka All India Trinamool Congress u Saket Gokhale namar ka jingkynnoh bamsap ïa ka song pisa kaba kot haduh T. 632 klur ba la mang ban pyntreikam ïa ka Meghalaya Eco Tourism Infrasture Development Project (MEIDP).
Ïa kane la pyntip da u Commissioner & Secretary ka Tnad Planning ha u kyrwoh ba la phah ha ka Sngi Saitjaiñ da kaba pyntip ba ka Sorkar Jylla ka dang shong bishar ban mudui lang da ka mukotduma bai mynrain khmat pyrshah ïa u Gokhale namar ki jingïai kynnoh lamler, ki jingkynnoh bym shongnia, ki jingkynnoh ba pynthohbria lyngba ki lad pathai khubor, kaba la pynjah burom ïa ka Sorkar Jylla bad ïa ki Heh Ophisar.
Ha ka 4 tarik Nohprah, u Gokhale u la pynmih ïa u kyrwoh lyngba ki lad pathai khubor da kaba kynnoh ba u Myntri Rangbah ka Jylla u Conrad K Sangma bad u Commissioner & Secretary ka tnad Planning Dr. D. Vijay Kumar, ki la pyndonkam bakla ïa ka pisa kaba kot T. 632 klur lyngba ka Meghalaya Age Limited ban pyntreikam ïa ka MEIDP.
“Ka Meghalaya Age Limited, ka la mudui ïa ka mukotduma bad phah tuklar ïa ka Kashari jong u Chief Judicial Magistrate ka East Khasi Hills katkum ka kyndon 200 bad ka kyndon 190 jong ka Criminal Procedure Code, 1973, ban ai da ka jingpynsajia ïa u Gokhale namar ka jingpynthohbria bym shongnia katkum ka kyndon 499, ban pynsajia katkum ka kyndon 500 jong ka Indian Penal Code, 1860” ong u kyrwoh na u Commissioner & Secretary.
U Commissioner and Secretary u la ong ba katkum kane ka jingmudui, ki jingkynthoh jong u Saket Gokhale ka la khring ruh ïa ka jingtian bishar katkum ka kyndon 505 jong ka Indian Penal Code kaba dei bad ka jingïalam bakla ïa u paidbah.
Da kaba pyntip ba ka Meghalaya Age Limited ka dei ka kompani jong ka Sorkar Jylla kaba treikam hapoh jong ka tnad Planning ïa kaba la pynkha katkum ka kyndon 2 (45) jong ka Companies Act, 2013, u Commissioner & Secretary ula ong “la seng ïa kane ka kompani tang ban pyntreikam ïa ki projek kiba wan pisa na shabar (Externally Aided Project), ban kyntiew ïa ki kam jngohkai, ban pynlong ïa ki tamasa kiba ïadei bad ki kam jngohkai, pynlong ïa ki jingïalang ban pynneh pynsah ïa ki nongkynti/jingtei ba la rim ha ka Jylla Meghalaya”.
“Ka jingmudui ka kdew ba u Gokhale u dei uba ju mlien ban kynnoh bad bym da kheiñ snep ïa ka lynti jong ka aiñ bad u dei uba bna nam ruh halor ka jingpynmih ïa ki jingkynnoh lamler pyrshah ïa ki nongmihkhmat bad ïa ki heh Sorkar” ong u kyrwoh.
Katkum u kyrwoh jong u Commissioner & Secretary, ka Kashari jong ka Delhi High Court ha u snem 2021, ka la kynthoh tyngeh pyrshah ïa u (Gokhale) namar kijuh ki rukom kynnoh ba la pynjah burom pyrshah ïa ki shakri Sorkar. U ong ba kane ka Kashari ka la bthah ruh ba u Gokhale u dei ban da wad bniah shuwa ïa kiei kiei baroh hashuwa ban pynmih ïa kine ki jingkynnoh bad ba u la dei ruh ban da pan jingpynshai na ki briew kiba u kynnoh pyrshah.
Ka jingujor ka la kdew ruh ba u nongshah mudui (Gokhale) u dei uba dang shu shah kem dang shen ha ki Pulit jong ka Jylla Gujarat namar ka jingpyllait ïa ka khubor lamler kaba ïadei bad ka jingjia ba sngewsih ha ka Jylla Gujarat.
U Commissioner & Secretary jong ka tnat Planning ula pynpaw ruh ha ka jingujor jin lada u (Gokhale) u la pan jingpynshai na ka Meghalaya Age Limited katkum ka hukum jong ka Delhi High Court, kan jin da pynpaw ba kine ki jingkynnoh ki dei kiba khlem nongrim bad ki bym shongnia.
U la kdew ruh ba kine ki jingkynnoh lamler pyrshah ïa ka Meghalaya Age Limited ka lah ban ktah jur hadien habud ha ka jingpyrshang ban pynïoh ïa ki projek ban pynïoh pisa na shabar ka Jylla Meghalaya na ki kynhun bapher bapher.
“Kane kan sa ktah jur ïa ka buit ban wanrah ïa ki kam pynroi jong ka Jylla kaba long da kaba wanrah ïa ki jingkynshew pisa lyngba ki projek ban wan ka pisa na shabar ha kaba la thaw ïa ki lad aikam aijam bad ban kyntiew ïa ka ïoh ka kot hapoh ka Jylla” ula ong.
Lah ban kdew ba hapoh ka Externally Aided Project ba la pyntreikam ha ki jylla ka thaiñ Shatei Lammihngi, ka Sorkar India ka pyllait haduh 90% ka song pisa kum ka Grant sha ka Sorkar Meghalaya.