Da ka ‘Mission Riewhadem’ ai jingmut ka committee ki MLA sha ka sorkar ban pynmih ïaki jingbam syiar

Nongpoh, Nailar 11: Ka Committee on Government Assurances ka State Legislative Assembly hadien ka jingleit jurip ïaki jaka pynmih ïaki jingbam syiar bad jingbam sñiang kaba don ha Umiam, kala iohi ïaka jingdonkam bad ka jingdawa jong u riew hadem kumno ban shna bad pynmih ïaki jingbam syiar ne sñiang namar ka jingdonkam ka jur bha ha kane ka jylla jong ngi.
Haba kren sha ki lad pathai khubor naka liang u Chairman katei ka committee u Bah Renikton Lyngdoh Tongkhar u la ong ba kum ka kynhun ki MLA kila iohi shai kdar ïaka jingdawa jong u riew hadem haka jylla ka don bha hynrei ngim don kano kano ka jingpynmih riew hadem naka jylla lade bad 90% la wanrah beit nabar jylla.
Kum u Chairman katei ka committee u la ong ruh ba bun naki paidbah kim iohi ïaka jingdawa jong u riew hadem haka jylla, hynrei kim pynleit jingmut bad thung daki bym da don than ka jingmih kumta kum ka committee kan sa ai jingmut sha ka sorkar ban sdang noh da ka Mission Riewhadem ban ailad ïaki nongrep ban thung ïa utei u jait jingthung bad awa bah haka jylla kumba ka Ri-Bhoi District kadei kawei naki jaka kaba utei u jait jingthung u long bha.
Lyngba kane ka mission riewhadem kan wanrah ka lad kamai, ka lad iohkam iohjam ki khun samla khamtam ban shalan sha kitei ki jaka shna jingbam jong ki mrad kiba ngi ri ban bam doh ba ka jylla kam donkam shuh ban da khuslai than bad ban ap ïa kaba wan nabar hynrei ban ïaleh katba lah ban kyrshan hi dalade ïalade.