Da ka Mission Mode Plan ba 5 snem bad 25 klur ban ïakhun pyrshah ïa ka jingpang AIDS

Shillong, Nohprah 01 : Ka sorkar jylla ka la rakhe da ka rukom kaba shongkun ïa ka World AIDS Day mynta u snem da kaba buh da ka plan treikam kaba san snem ryngkat ka jingmang kaba haduh 25 klur tyngka na ka bynta ban pynjur shuh shuh ïa ka jingphah test bad sumar na ka bynta kito kiba ïoh ïa utei u khniang jingpang ha ka jylla.
Ïa kane la pynbna da u Myntri ka tnad ka Koit ka Khiah ka Jylla Bah Wailadmiki Shylla ha ka jingïalang kaba long ha State Convention Centre. Kane ka sienjam ba ka sorkar Meghalaya ka shim kadei kaba nyngkong napdeng ki katto katne ki jylla kiba buh thong ban ïakhun tyngeh na ka bynta ban buh da ka mang pisa ban wanrah ïa ka jingkylla.
Hapoh katei ka plan, ka sorkar kan sa pynïar shuh shuh ïa ka jingdon ki jaka test bad ki jaka sumar, nangta ban pynjur shuh shuh ïa ka jingïatrei lang ki shnong. Kane ka mission kan peit ruh ba kan ym don ka jingpeit khmat ïa kito kiba ïoh ïa utei u khniang jingpang.
U Myntri u la khot ruh ïa ka jingïatrei lang jong baroh da kaba pyntip ba ïa u HIV lah ban sumar bad baroh ki jingsumar lah ban ïoh ei. U la ai ruh ka jingïaroh ïa ka Meghalaya AIDS Control Society (MACS), hapoh ka jingïalam jong u Project Director Dr. K. L. Ïawbor, ryngkat ki nongtrei katei ka tnad kiba ïakhun borbah ban pynphriang ïa ka jingpynshai bad ka jingpynsngewthuh ïa ki paidbah.
Na ka liang u Principal Secretary (Health & Family Welfare), u Sampath Kumar u la ïathuh ba ki don palat 9,000 ngut ki briew kiba im bad u HIV bad ki don pat kumba 900 ngut kiwei pat kiba lap thymmai man u snem ïa kiba bun la lap na kaba leit ban test. U la ïathuh ba haduh mynta hi, ka East Khasi Hills, West Jaintia Hills bad East Jaintia Hills ki dang ïai bteng ban bat ïa ka kyrdan kaba bun eh kiba don ïa une u khniang jingpang.
Ha kane ka jingïalang la ïoh ruh ïa ka jingkren na u Paul Hrangbung, President jong ka Meghalaya State Network of Positive People (MSNP), bad advocate Agui Deimei.
La donlang ruh ha kane ka sngi naduh ki MLA ba kynthup ïa u Bah Olan Sing Suin, Adelbert Nongrum bad Bah Matthew Beyondstar Kurbah kynthup ïa ki heh ka tnad ka Koit ka Khiah naduh ka Dr. J. S. Momin, Dr. Neela E. Kharsahnoh, Dr. Lumrilyne Mylliemumlong bad Dr. Rezina Ch. Marak.
La pynkut ïa ka prokram da ka soskular ban pynduh ïa ka jingniewbeiñ, ban pynkhlain ïa ka jingpynshai paidbah, bad ban pynthikna ba uwei pa uwei u nongshong shnong ha Meghalaya un ïoh ïa ka jingtest bad jingsumar kaban pynskhem ïa ka thong jong ka sorkar ban pynlong ïa ka jylla kaba lait na u HIV ha ki san snem ban wan.