Da ka Mission Mode ba 25 klur yn ïakhuh pyrshah ka sorkar ïa ka jingpang HIV/AIDS ha ka jylla

Shillong, Nohprah 19 : Namar ka jingnang kiew ha ka jingdon ki briew kiba kit ïa u khniang jingpang HIV/AIDS ha Meghalaya, u Myntri Rangbah ka Jylla Conrad K Sangma ula pynbna ïa ka prokram ba 5 snem kaba long ha ka dur jong ka Mission, ban ïakhun pyrshah ïa ka jingpang HIV/AIDS ha Jylla.
Kat kum ka jingong jong u, ka Sorkar kala mang na ka mang tyngka haduh 25 klur tyngka sha kane ka Mission ka ban long 5 klur ha ka shisnem bad ka thong ka long san snem lynter.
ïa kane ka jingtyrwa la ai jingmynjur da ka Kynhun Myntri kaba la shong ïa ka jingïalang ba khatduh jong une u snem hynne ka sngi Thohdieng.
“Ha ka jingthaw jong ngi ïa ka DREAM project….ngi sngewthuh ba ka don ka jingma ha ka jingkiew ka jingdon ki briew ba don jingpang HIV/AIDS ha Jylla. Kumta, ngi donkam ban wanrah ïa ka prokram ha ka dur jong ka Mission….ban tehlakam ïa kane ka jingkiew ki nongpang ha ka imlang sahlang jong ngi” ong u Conrad haba ïakren bad ki lad pathai khubor.
“Ha kane ka mission ba 5 snem bala ai jingmynjur da ka Kynhun Myntri hynne ka sngi, ngi la mang ïa ka mang tyngka ba kot 25 klur tyngka, kata ka long 5 klur tyngka ha ka shisnem, ïa kaban pyndonkam na ka bynta ki jingtei, ki jingïalap bad kiwei kiwei ki prokram ban leh lyngba kane ka mission” ula ong.
U Conrad ula pynpaw ba kane ka rai jong ka Sorkar ka dei kaba la pynshong nongrim na ka jingima ka jinglong jingman bad ong “ka jingkiew jong ka HIV/AIDS ha Meghalaya kala nang kiew ha ki snem bala leit” haba pyntip ba ka jingdon ki nongpang mynta kila kot 0.43% kaba kham heh ban ïa ka national average ba kot 0.21%.
Kat haduh u 2024, ula pyntip ba ki don kumba 9,589 ngut ki briew kiba im ha ryngkat ka jingpang HIV/AIDS bad kiba dang kem pang thymmai ruh ka heh bha, kaba kot haduh 982 ngut ha ka shisnem.