Shillong, Nohprah 29: Shuwa ban jam sha u snem thymmai 2024 kawei na ki kynhun ïa kaba la tip da ka Forever Young kumba ka ju leh man la u snem shuwa ban jam sha u wei pat u snem sa shi sien pat kan sa pynlong biang ïa ka ‘Jngi Shiteng Synnia’ kaba 26 (26″ Midnight Swim) ka ban long ha ka shiteng-miet jong ka 31 tarik mynta u Nohprah, 2023.
ïa kane ka Jngi Shiteng Synñia la pynkhreh ban pynlong ha ka pung jngi ‘Cronoline Swimming Pool’.
Kane ka jingïa ‘Jngi Shiteng Synñia’ ka long ruh shi bynta ban pdiang sngewbha ïa u snem thymmai 2024 ha ryngkat bad ka jingduwai ha U Trai Kynrad ba un ai ka bor ban ïakhun pyrshah ïa ki jingeh ban sa ïakynduh ha une u snem thymmai.
Ha kane ka jingïajngi shiteng synñia la pynkhreh hynniew (7) ton u thah ha katei ka pung.
Na ka liang jong ka kynhun ba pynlong ïa katei ka jingïa jngi shiteng synñia ka la kyrpad ïa kino kino kiba wan ïashimbynta ba kim dei ban dih ïa kino kino ki jingdih pynbuaid shuwa shuwa ban jam shapoh ka pung.
