Da ka Mercedes Benz jong u Bah Brol la rejistar nyngkong eh ha DTO Mairang

Mairang, Naitung 05: Ka District Transport Office (DTO) Mairang, kaba la plie mynta ka sngi ka la aiti ïa ka registration kali kaba nyngkong eh bad kata kadei ka kali Mercedes Benz jong u MLA ka Mawthadraishan, u Bah H. Brolding Nongsiej, uba long ruh u Myntri ka sorkar jylla ba peit ïa ka tnad Water Resources bad kiwei kiwei ki tnad.
U DTO ba nyngkong eh jong ka Eastern West Khasi Hills, u Bah W. Makdoh, u la aiti ïa ki kot ki sla ha u Bah Brol ha ka por ba plie ïa kane ka ophis treikam ha Mairang. Ka registration jong kane ka kali Bah Brol kan long ML15- 0004.
Ha kane kajuh ka jingïalang, ha ka por ba u Kongsan, u Bah Metbah Lyngdoh, MLA Mairang bad Speaker ka Meghalaya Legislative Assembly u dang kren, u la kyntu ruh ïa u Myntri ka tnad Transport u Bah Dasakhiat Lamare ban rejistar ïa ki kali jong u sha Mairang, u Bah Dasakhiat u la jubab na kaba shong ryngkat ka rkhie, “Ngan sa rejistar ïa ka Lamborghini jong nga”.
Haba kren ha kane ka jingïalang Bah Metbah u la pynpaw ka jingsngewkhia halor ka jingbun ki jingjia aksiden kali kiba ïai jia na ka sngi sha ka sngi. Namarkata, u la kyntu ia ki nongshongshnong ban long kiba phikir ha ka por ñiah kali, nangta ba kin pynbiang ïa ki kot ki sla bad ban bud pyrkhing ïa baroh ki aiñ ki kyndon khnang ban lait na kino kino ki jingjia aksiden ne ki jingjia ba sngewsih bad u la ong ruh ba ka jingplie ïa ka ophis u DTO hapoh Mairang kan pynthikna ba ïa ki kyndon aiñ ka tnat Transport la bud pyrkhing da baroh ki paidbah nongshongshnong na ka bynta ka suk ka shngaiñ ki nongñiah, ki nongshongkali bad baroh ki paidbah.
U Lamphang, ha ka jingkren jong u, u la kyntu ruh ïa ki trai kali ba kin siew thikna bad siew tista ïa ki khajna kali ryngkat ka jingpynbiang ïa ki kot ki sla, khnang ban lait na ka jingshah daiñ kuna, namar mynta ym lah shuh ban leh thok ne leh da kumwei, haba la pyntreikam da ka Digital System naduh na Delhi.
Ha kajuh ka por u Bah Metbah u la kyntu ïa ki paidbah kiba ju thied kali ba kin da husiar bha ban lait na kaba thied ïa ki kali kiba shu tuh, namar kane ka jingdie ïa ki kali ba shu tuh ka la sdang jyllei bha ha ka jylla. Kumta donkam ban da phikir bad ban nym leh stad than, hynrei dei ban kylli da pyrthew bad wad jingtip bha shuwa ban thied.
Ha kane ka jingïalang la ïoh jingkren ruh na u Bah Dasakhiat Lamare, Myntri ka tnad Transport, u HB Nongsiej, Myntri ka tnad Water Resources, Bah Israel Ingty, Commissioner of Transport, Bah W. Nongsiej, DC Eastern West Khasi. La pynshongshit ïa kane ka jingplie ophis da ka jingrwai na ki Samla ka Shnong Kynshi Mawria bad ka jingshad tynrai da ki dkhot ka SHG na Umthied Bynther.
La pynïaid ïa ka jingïalang da u Bah A. Nongbri, ADC ka Eastern West Khasi.