Nongpoh, Jymmang 02: Kum ka jingshim bynta lang ban rakhe ïaka Northeast Festival 2022 bala pynlong ha baroh ki jylla ka thaiñ Shatei Lam Mihngi naduh ka 28 Ïaiong haduh 4 tarik Jymmang 2022, da ka Ministry of DoNER jong ka sorkar pdeng kaba dei ruh shibynta ka jingpynkhreh ïaka jingdap 75 snem jong ka ri India, ka ophis u Deputy Com missioner ka Ri-Bhoi District kila pynkhreh ban pynlong da ka Mega Event ha Ri-Bhoi District haka 3 tarik mynta u bnai ha madan Byrnihat.
Ïa katei ka prokram yn pynlong ruh halor ka jingdap 50 snem ka jylla, ka Beti Bachao Beti Padhao bad ka Azadi ka Amrit Mahotsaw jong ka jingdap 75 snem ka ri India bad ha katei ka jingshim bynta haka jingrakhe ïaka North East Festival naka liang ka bor district ha Ri-Bhoi kila pynlong ruh ki jait prokram bapher bapher ha kane ka taiew bad ki jingïakop bapher bapher kum ka jingkyntip ktien ban sa shim bynta da ki khynnah skul naduh klas VIII haduh XII naki Block bapher bapher ka Ri-Bhoi District haka 4 tarik mynta u bnai ha District Library bad la pyntip ruh ba haka 3 tarik mynta u bnai kan sa don ruh ka SHG Mela ha Madan Byrnihat.
Kumta naka liang ka ophis u Deputy Commissioner ka Ri-Bhoi District u la khot bad wer ïaki paidbah ban wan ïashim bynta ha katei ka prokram bad khamtam ki khynnah skul ban ïashimbynta haki jingïakop khnang ba katei ka prokram kan long kaba jop.
