Shillong, Nailar, 30: Ka Kynhun Myntri jong ka Sorkar Jylla ha ka sngi Baar ka la mynjur ban tei ïa ka shlem ai jinghikai ha ka liang ka Koit ka Khiah ha West Garo Hills District.
Ïa ka jingtyrwa ban tei ïa kane ka jaka ai jinghikai ha ka koit ka khiah ka ban kot haduh T. 151.95 la mynjur da ka Kynhun Myntri ha ka jingïalang ba la pynïaid da u Myntri Rangbah ka Jylla u Conrad Kongkal Sangma.
Ha ka jingïakren bad ki lad pathai khubor hadien ba la wai ka jingïalang, u Myntri Rangbah u la ong ba ka jingthmu ban shna ïa kane ka projek, “‘Medical Skill Hunar Hub’ ka long ha u snem 2020 ha Babadam, West Garo Hills District.
U la ong ba dei tang ka West Garo Hills kaba la shah jied ban ïoh pisa na ka bynta ban shna ïa kane ka projek lyngba ka Ministry of Minority Affairs ka Sorkar Pdeng.
Katkum ka jingïathuh jong u Conrad, naduh u snem 2022, hadien ba la wanrah ïa ki jingpynkylla, baroh ki district kin sa lah ban ïoh ïa ka song jingïarap pisa na ka Ministry of Minority Affairs.
“Ha ka jingshisha ngi la tyrwa T. 282 klur na ka bynta ban shna ïa kane ka projek hynrei hadien katto katne ki jingpynbeit la hap ban pynkylla khyndiat ha ka jingtyrwa bad ka Minority Affairs jong ka Sorkar India ka la mang pisa T. 151.95 klur na ka bynta kaneka projek,” u la ong.
U la ïathuh ba ka jingbei pisa ïa kane ka projek kan long 90:10 ha kaba 10 percent yn bei da ka Sorkar Jylla bad 90 percent kata, T. 135 klur yn bei da ka Sorkar Pdeng.
U la ïathuh ruh ba kane ka Hunar Hub kan ai jinghikai palat 2,500 ngut ki samla pule ha kaba ka tnat pule kan long ka jingshna ïa ka Pharmaceutical College, ka Nursing College, ka Paramedical College bad kawei ka Skill Development Centre.
“Kin don ruh ki Hostel na ka bynta ki samla kiba pule ha kane ka centre,” u la ong haba pynbna ba ka hunar hub long kawei na ki shlem pule ha ka liang ka koit ka khiah kaba heh tam ha ka thaiñ Shatei Lammihngi baroh kawei.
Shuh shuh u Myntri Rangbah u la pyntip ba ka Sorkar ka ladep pyllait khyndiat ïa ka pisa bad yn sa pyntrei ïa kane ka projek da ka Engineering Project Ltd (EPL), kaba dei ka Public Sector Undertaking (PSU).
