Tura, Jymmang 14 : U Myntri Rangbah ka jylla, Conrad K Sangma ryngkat u Myntri ka tnad ka Koit ka Khiah ka jylla, u James PK Sangma ryngkat u Chief Adviser jong u Myntri Rangbah, u Thomas Sangma ha kane ka sngi Saitjaiñ, la buh ïa u mawnongrim na ka bynta ban tei ïa ka PA Sangma Medical Skill Hunar Hub kaba kot haduh 150 klur tyngka ha Dumindikgre kaba don hajan Babadam, West Garo Hills.
Ïa katei ka projek kaba la bei tyngka da ka tnad Minority Affairs jong ka sorkar pdeng hapoh ka Pradhan Mantri Jan Vikas Karyakram, la pyntreikam lyngba ka tnad Social Welfare.
Ka jingthmu jong katei ka Medical Skill Hunar Hub ka long ban ai jinghikai ïa ki samla ha ka kam nos kumjuh ruh na ka bynta ki paramedics.
Haba kren ha katei ka jingïalang buh mawnongrim, u Myntri Rangbah u la pynpaw ka jingsngewnguh ïa u Myntri Rangbahduh ka Ri, u Narendra Modi bad kumjuh ïa u Myntri ka tnad Minority Affairs u Mukhtar Abbas Naqvi na ka bynta katei ka projek kaba heh. U ong ruh ba katei ka jaka ai jinghikai na ka bynta ki nongtrei ka koit ka khiah kan ïarap na ka bynta ka jingdonkam ban pynbiang ïa ki nongtrei kiba tbit ha ka koit ka khiah.
U ong ruh ba ka jylla ryngkat bad ka ri baroh kawei ki la kynduh ïa ka jingeh kaba khraw bha ha ka jingïakhun ïa ka khlam COVID kaba la neh ha kine ki lai snem. “Ka jylla ka la kynduh bun ki jingeh na ka daw ka jingduna ki nongtreikam khamtam ki nos na ka daw ka jingbun ki nongpang kiba shah sumar ha kylleng ki jaka sumar kiba don ha ka jylla ha ka por ba wan syllad ka khlam,” u la ong.
Nalorkata, u ong ruh ba ka jingsngewnguh kadei ïa ka Minority Affairs hapoh ka jingïalam jong u Abbas na ka bynta ka jingpdiang ïa ka jingkyrpad jong ka sorkar ban ai ïa katei ka projek kaba donkam tam ha ka jylla.
Da kaba kam ba ka thong ban kyntiew ïa ki jaka ai jingsumar kadei ka bynta kaba hakhmat eh jong kane ka sorkar, u Myntri Rangbah u la ong, “Ngi donkam ban pyntikna ba donkam ban ai kyrpang ïa ka tnad ka Koit ka Khiah khnang ba ha ki por ban wan yn dup lah ban ai ka jingshakri kaba kham paka ïa ki paidbah bad ruh lada jia ba wan biang ki jingjia kum ka khlad COVID ka jylla kan long kaba la biang nadong shadong.”
Na ka liang u Myntri ka tnad ka Koit ka Khiah, u James K Sangma u la ong ba ki la don bun ki lad ki lynti ba ka sorkar ka la shimkhia ban pynbha ïa ka tnad ka Koit ka Khiah na ka bynta ka jingmyntoi jong ki paidbah nongshong shnong.
U ong ruh ba ka Medical Hunar Hub kan dei ka jingïarap kaba kyrpang bha na ka bynta ban ïoh ïa ki nongtrei kiba tbit ha ki kam
sumar khamtam katkum ka thong jong ka Preventive Health Care kaba la kdew shai bha ha ka Meghalaya State Health Policy.
