Shillong, Nailur 23 : Ki paidbah nongshong shnong ka Mawlai kin ïoh ïa ka lad ban pyni ia ka sap bapher bapher ba ki don la ka long naduh ka jingïalehkai phutbol, ki jingïalehkai bor met ne athletics, ka badminton, basketball, ïakhun kti bad ruh wat ha ka jingïakob siatkhnam ha ka lympung ïalehkai kaba heh tam jong ka thain kaban tip kum ka Mawlai Games and Literary Fest.
Ha kajuh ka por pat haba ïadei bad ka Literary Fest kan kynthup naduh ka jingïakop ïatyrko, ïakob kyntip bad ruh ka jingïakob kren paidbah nalor ka jingïakob ‘Tang Shi Kyntien’ kaba la plie lad ïa baroh ki samla kynthei bad shynrang na baroh ki 24 tylli ki shnong jong ka Mawlai Constituency.
Halor kane na ka liang ka Organizing Committee jong ka Mawlai Games and Literary Fest ha ka sngi Nyngkong ka la pyllait paidbah ïa ka shap lane ka logo na ka bynta ka Mawlai Games and Literary Fest 2026 kaba la thmu ban sdang naduh 05 haduh 10 tarik u Kyllalyngkot 2026.
Ïa ka shap jong ka lympungbah la plie paidbah da u Rangbah Shnong ka Mawlai Nonglum Bah JS War ryngkat ka jingdonlang u Chairman Bah GS Kharbuli, Secretary Bah T Lynshing, u Organising Secretary cum Spokesperson Bah Elmer R War nalor kiwei kiwei ryngkat u MLA Bah Brightstarwell Marbaniang kumjuh u MDC ka thain Bah Eddieson Kharumnuid.
Na ka liang ki bor pynïaid ki la ïathuh ruh ba ka jingthmu jong kane ka lympung ka long ba wanrah ka jingteh song hapdeng ki samla ka thain Mawlai hi baroh kawei bad ha ka juh ka por ban plie lad ïa ki samla shynrang bad kynthei ba kin ïashim bynta lang ha kitei ki jingïalehkai bapher bapher.
