Nongpoh, Naiwieng 02: Ka Balang Katholik jong ka Nongpoh Parish mynta ka sngi ka la pynlong ïa ka jingkynmaw burom ïa ka sngi kyrpang jong kito ki mynsiem ba la khlad noh ba la ju tip ruh ha ka pyrthei kum kata ka ‘All Soul’s Day’, ha kaba na ka liang ki paid riewngeit ki la shim bynta shitrhem ban leh burom ha u Lum jingtep ka Balang Katholik kaba don ha Mawroh ba hap ha ka Nongpoh Parish.
Ha kane ka jingleh burom ne kynmaw burom ïa ki mynsiem jong kito kiba la khlad noh la shim bynta ruh da ki paid riewngeit bad ki ba haïing hasem ban ïa lum ha utei u Lum Jingtep, ha kaba ki la leh burom da kaba buh ïa ki syntiew ki skut bad thang ïa ki mombati ban duwai kyrpang na ka bynta ka mynsiem jong kito kiba ieit ba thoiñ kiba la khlad noh na sla jong kane ka pyrthei.
La kynmaw burom ruh ïa ki mynsiem ba la khlad noh da ka Mass bakhuid ha kaba u Fr. Raphael Risterland Maiong u la shim bynta ban pyndep ïa ka niam ka rukom ha kane ka jingleh niam kyrpang na ka bynta ki mynsiem ba la khlad noh. Nalor kata la pule ruh ïa ka ktien ka jong u Blei bad la sam ïa ki symboh pyrkhat kiba dei halor ka jingkynmaw burom ïa ki mynsiem ba la khlad noh na kane ka pyrthei, kaba dei ruh shi bynta ka thymmei jong ka jingngeit ka Balang Katholik ba ka bor jong ka jingïasaid ka donkam na ka bynta ka mynsiem jong kito kiba la khlad noh ban ioh ïa ka jingmap bad kata ka jingjahthaid kaba bym jut kut ha ka khet jong u Blei.
U Fr. Raphael Risterland Maiong u la shim ruh ïa ka bynta ban pharia ïa ka ktien ka jong u Blei ha kaba la sot na ka shithi ba nyngkong u Ioanis na ka lyngnong 4:8-16, kaba ong, “ Ba u Blei u long ka jingieid” ba kum u ki paid riewngeit ki dei ban sngewthuh ba u Blei u long shisha ka jingieid, hakaba dei namar kane ka daw ngi leh burom ïa kine ki ba la khlad noh, namar ngi ngi ngeit skhem ba kine kiba la khlad noh ki don ha ki ksangkti ba don bor jong u Blei.
U la ong ruh ba katkum ka jingngeit ka Balang Katholik, ngi ngeit ha kata ka jingmihpat jong ka doh, ha kaba mynta kine kiba la khlad noh ki ioh thiah shipor ha une u lum kyntang bad kan poi ka por ka jingmihpat kumba u Jisu u la pynmihpat ïa u Lasarus na ka jingiap.
Ban batai halor kine ki mynsiem kiba dang ioh thiah shipor, u Fr. Raphael Risterland Maiong u la shim ruh ki symboh pyrkhat na ka Kitab jingstad, kaba ong, ba kine kine kiba ioh thiah shipor, ki don ha ki ksangkti jong u Trai, hynrei ki donkam ïa ka jingïasaid ha kaba Ka Balang Katholik ka ju kynmaw burom ïa ki mynsiem ba la khlad noh ka long ban duwai ne ïasaid na ka bynta ka mynsiem jong ki, ba kin ioh ïata ka jingjahthaid kaba bym ju kut.
Shuh shuh, u la kyrpad ruh ïa ki paid riewngeit ba ki de ban long kita kiba skhem ka jingngeit bad khamtam ban buh ïa kita ki jingduwa kiba kyrapang kiba long kum ka jingïasaid ba donbor, namar katkum ka jingngeit ioh lehse dang don kita ki jingpynwit ïa kita ki mynsiem ban poi sha ka khet u Blei bad lyngba ka jingduwai bad ka jingïasaid ngi ngeit skhem ba U Blei un pynlait na kita ki jingpynwit pynwa ïa ki mynsiem ba la khlad noh ban ioh ïa kata ka jingjahthaid ha ka khet ka jong u Blei.
Nalor ka Mass bakhuid, ka jingpharia ïa ka ktien ka jong u Blei bad ka jingïabam ïa sip ïa ka met jong u Trai, la pynkut ruh da ka jingkyrkhu ïa u Lum jingtep da utei u Lyngdoh Sohblei rygnkat ki jingduwai bad ki jingtyrwa ban ïasaid kyrpang na ka bynta ka mynseim jong kito kiba la khlad noh ba la shim bynta da ki paid riewngeit bad kiba haïing hasem jong kito kiba la khlad noh.
