Mawkyrwat, Risaw 21 : Kum shibynta jong ka jingrakhe ïa ka lyngkhuh sngi ïap ba 37 snem jong u Syiem Wickliffe Syiem uba dei u Syiem ba khraw jong ka Hima Nongstoiñ Syiemship, na ka liang ka Hynñiewtrep National Youths Front jong ka South West Khasi Hills District ha ryngkat ka HNYF Central Body mynta ka step jong ka 22 tarik u Risaw, 2025 ki la ïoh ban kynmaw burom da kaba pynlong ïa ka jingïalehkai mareh marathon ha Mawkyrwat ha kaba u bah Renikton L. Tongkhar MLA ka Mawkyrwat Constituency u la long kum u kongsan.
Ki nongjop ha kane ka jingïakop ki long u Bankitbok Ramsiej, u Masterson Jyrwa, bad u Blessfullson Wartde jong ki khynnah shynrang, nangta ka Larijanai Wartde, ka Phibanïaineh Lyngkhoi bad ka Ribanpynsuk Nongsiej jong ki khynnah shynrang.
Ki nongjop ha ka liang jong ki samla shynrang ki long u Wonderful Paliar, u Iwelljohn Ramsiej bad u Jinesfulson Hoojon, katba jong ki samla kynthei pat dei ka Daplin Wahlang, ka Phidashisha Lyngdoh bad ka Bandasharai Marweiñ.
Ha ka kyrdan ba 50 snem shajrong jong ki longkmie dei ka Brida Kharjahrin, katba jong ki longkpa pat dei u Kingdar L. Wahlang bad u Lendar Ramsiej. Shuh shuh la sam ruh ïa ka khusnam ba dei ki nongïashimbynta ba khynnah tam dei u Johnfullson Marweiñ uba dang 6 snem karta.
Ka jingsam jong ka HNYF ïa ki khusnam nongjop ka dei da ka song pisa, ki khusnam (medal) bad ki syrnod. Haba kren ha ka jingïalang ba lyngkot, u bah Renikton Lyngdoh Tongkhar uba dei u MLA ka Mawkyrwat Constituency u la ong ba kane ka sngi ka dei ka jingsahkynmaw ïa uwei na ki ‘riew shlur jong ka jaidbynriew kata u Wickliffe Syiem. Namarkata, u khmih lynti ba nangne kin sa mih ki ‘riew shlur ha ki bynta baroh jong ka jingim ban long ruh ki nongjop ha ki jingim jong ki da kaba kitbok kitrwiang ha ryngkat ki met kiba koit ba khiah krat bha.
Kiba la donlang ha kane ka sngi ki kynthup ïa u bah Shiningstar Wanniang, President ka HNYF South West Khasi Hills District, u bah Tyllibor Swer, General Secretary HNYF Central Body, u bah Barnabas Manih, Vice President HNYF Central Body bad kiwei de ki riew rangbah ba la shah khot sngewbha.
