Shillong, Naitung 17 : Kum shi bynta ban kynmaw burom ïa ka lyngkhuh dap 187 snem ka jingkhlad u Pa’iem Tirot Sing Syiem u Syiem, Hynñiewtrep Youths’ Council (HYC) Laimer Area Unit ha ka sngi Saitjaiñ jong ka taïew ba lah dep ka la pynlong da ka jingïakop mareh Marathon kaba jngai 10 km.
Ïa kane ka jingmareh marathon ba la sdang na Petrol Pump Laimer la wan ban kaweh lama da u Bah Hamletson Dohling Myntri sorkar ha kajuh ka por u MLA ka Mylliem Constituency kum u kongsan. Ha kane ka jingïakop mareh marathon ba 10km la wan ban ïashim bynta naduh ki hep kiba rit shynrang bad kynthei, ki samla haduh ki rangbah. Ïa ka jingïakop mareh la pynkut pat ha Madan Umlyngka ha kaba la pynlong ruh ka jingïalang ba lyngkot bad sam khusnam sha ki nongjop.
Ha kane ka jingïakop mareh u samla Wolbestar Ramsiej u jop kyrdan ba nyngkong, u samla Weljohn Ramsiej ha ka kyrdan ba ar bad u Samla Saiñkupar Jyrwa ha ka kyrdan balai. La sam khusnam da ki syrnot ha ryngkat ka song pisa.
aba ai jingkren ha kane ka sngi na ka liang u Bah Hamletson Dohling u la ai khublei ïa ka HYC kaba la pynlong ïa katei ka marathon kaba long ka jingïarap na bynta ka koit ka khiah ïa ki hep kiba rit ki samla bad kumjuh ruh ïa ki rangbah.
U la kyntu ïa ki nongïashim bynta ba kim dei ban kut tang ha jingmareh ba shi sngi hynrei ba kin ïai bteng ban pynmlien ïalade ban mareh bad ruh ban shim bynta ha kiwei kiwei pat ki jait jingïalehkai. U la ong ba ha ka jingïalehkai don kiba jop bad ba rem hynrei kim dei pat ban duh mynsiem hynrei kin ïai bteng ïa ka mynsiem ïalehkai khnang ba ha kawei ka sngi kin long ki nongjop.
Ha kane ka sngi la donlang ruh ki nongkitam jong ka HYC Laimer Area Unit, ki riew rangbah bad kiwei kiwei.
