Da ka Mangtyngka ba duna 55,080 tyngka wanrah u CEM ka KHADC na bynta u snem 2023-24
Shillong, Jylliew 24 : U Chief Executive Member ka KHADC, Bah Pynïaid Sing Syiem ha ka sngi Saitjaiñ ula wanrah ïa ka mang tyngka kaba duna 55,080 tyngka na ka bynta ka samoi treikam jong u snem 2023 -24.
Haba wanrah ïa katei ka mangtyngka, u CEM u la pyntip ruh ba ka jingmang ban pynlut ka poi sha ka 253,12,59,690 tyngka (253.1259 klur tyngka) katba ka jingmang ban pynmih pat ka long 253,12,04,610 tyngka (253.1204 klur tyngka)
“Kumban shu pynkynmaw ha ki snem ba la dep (2020-21 bad u snem 2021-2022) ka sorkar jylla ka la pyllait pisa lyngba ka 15th Finance Commission bad ha u snem 2022-23 ngi la ïoh pdiang ïa ka 2nd installment jong u snem 2020-21 bad ïa ka 1st installment jong u snem 2021-22 (Tied Grant) bad ïa ka pisa kaba dang sah ngi khmih lynti ba shen ngin sa ïoh pdiang noh,” ong u CEM.
Shuh shuh u ong ruh ba kane ka Executive Committee ka don ruh ka jingthmu ban pynïoh noh ïa ka ophis treikam ba thymmai ha New Shillong khnang ban pynsuk ïa ka leit ka wan jong ki nongtrei bad ruh ïa kiba wan donkam ha katei ka office kumba long kiwei ki tnad treikam.
“Ïa kane yn shimkhia da kane ka EC ban ïakren bad ïoh jaka bad jingïarap pisa na ka sorkar.”
Shwa kane, u CEM u la pyntip ruh ha Iing Dorbar ba ki don bun ki kam ba ka Council ka la ïoh ban pyndep ha kane ka samoi ba la dep. Kitei ki kynthup naduh ka Tourist Spot ha Maraikaphon, Sohra kaba la dep ban plei ha u Naiwieng 2022, nangta ka iew ha Mawryngkneng bad ruh ïa ka Hat thymmai ha Nongshken. U la pyntip ruh ba ïa ka jingkyntiew ïa ka mala kaba hajrong jong ka council ruh la lah ban pyndep katkum ka jingmang pisa na ka Excluded Areas.
U ong ruh ba ha kaba ïadei pat bad ka Iew ha Mawsynram, iew ha Riangdo (Market Complex) bad ka Tourist Spot ha Bishop Falls, Mawlai ka jingtrei ka dang ïaid shaid shaid.
“Ki jingtei ba dagn sah la mang pisa naka Rural Communication Grant ïa kaba ngi khmih lynti ban ïoh na ka sorkar jylla.” U CEM ha kane ka sngi u la wanrah ruh ruh ïa ki ar tylli ki Bill, kata ka Khasi Hills Autonomous District Council Service (Amendment) Rules 2023 bad ka Khasi Hills Autonomous District Council (Protection and Promotion of Khasi Traditional Medicines) (First Amendment) Bill, 2023.