Da ka Magisterial Inquiry thung ka Sorkar ba lait phet ki runar na Jowai District Jail

Shillong, Nailur, 12: Ka Sorkar Jylla ha ka Lah Sngi u Blei ka la thung da ka Magisterial Inquiry bad ka Independent Inquiry ban tohkit bniah ha kaba ïadei bad ka jinglait phet jong ki hynriew ngut ki runar na Jowai District Jail ha ka sngi Saitjaiñ jong ka taiew baladep.
Ha pyntip ïa kane ka jingjia ha ka Dorbar Synrai jong ka Iingdorbar Thawaiñ ka Jylla u Myntri ka tnat Kam Pohing u Bah Lahkmen Rymbui u la ong, “u District Magistrate u la bthah ïa u Additional District Magistrate jong ka West Jaiñtia HIlls u P.Kr. Boro ban pynlong ïa ka jingtohkit halor kane ka jinglait phet jong ki runar na Phatok.”
Ki saw ngut ki runar kiba la shah bom ïap ha ki paidbhur ki kynthup ïa u I Love You Talang na ka shnong Moorap, u Lodestar Tang na ka shnong Mootyrshiah, u Shidorki Dkhar na ka shnong Thangraiñ bad u Marsanki Tariang (koidi) na kas hnong Priang.
Ïa ka met jong kine ki saw ngut ïa mynta la buh ha ka jaka buh met ïap ha Civil Hospital, Ïalong.
U la pyntip ba la bynshet ruh ha u Additional Superintendent of Police jong ka West Jaiñtia Hills District ban pynlong ïa ka jingtohkit ba laitluid halor ki daw ba la pynlong ïa ki san ngut ki runar bad ïa uwei u koidi ban lait phet na Phatok.
La bynshet ruh ha u Additional District Magistrate Bah MA Challam ban pynlong ka jingtohkit ïa ki met ïap jong ki saw ngut ki runar kiba la shah bom ïap ha ki paidbhur ha ka khlaw ha sngi u Blei hajan ka shnong Shangpung, West Jaiñtia Hills District.
Ha ka sngi u Blei, da ki ngut eiei ki paidbhur na ki shnong bapher bapher hadien ba ki la ïoh jingtip ba u I Love You bad ka kynhun ki la wan thied ja song ha ka shnong Sjangpung ki la mih paidbah ban kthong bad ïoh khang kdong ha ka khlaw kaba don hajan ka shnong Shangpung.
U Bah Rymbui u la ïathuh ba tang shu ïoh jingtip, ka kynhun jong ki Pulit ki la hiar marmar sha kane ka jaka hynrei ynda la poi ha kane ka jaka ki lap ba ki saw ngut napdeng ki hynriew ngut ki runar ki la shah bom ïap ha ki paidbah.
“Ki Pulit ki la pyrshang ban ïakren bad ban pynjem ïa ka jingbitar jong ki paidbah khnang ban ïoh leit sha ka jaka ba la jia bad ban ïada ïa ki saw ngut. Hynrei, hadien ka jingïakhun bad ki paidbhur ki don ruh ki Pulit kiba la mynsaw.”
“Ki Pulit ki la ïohlad ban shimti bad ban pynkit ïa ka met jong ki saw ngut kiba lait phet na Phateok sha ka Civil Hospital da ka jingai jingbit jong u Magistrate uba dang don ka kamram,” u la ong.
“Hynrei ynda la poi ha Hospital, u Medical Officer u la pyntip ba kine ki saw ngut ki ladep khlad lypa,” u la bynrap.
Arngut napdeng kine ki hynriew ngut kiba la lait thaw da ka said na ka jingshah bom ïap ha ki paidbhur ki long u Ramesh Dkhar na ka shnong Mihmyntdu bad uwei pat u bym ïa don lang ha kane ka kynhun u dei u Rikmenlang Lamare na ka shnong Barato bad haduh mynta ym pat tip satia shano kine ki arngut ki don bad ki Pulit ki dang pynlong ka jingthwet kaba jur ban ïoh kem ïa ki, la ong shuh shuh u Myntri ka tnat Kam Pohing.
Shwa kane u Myntri ka tnat Kam Pohing u la pyntip ba la register da ka criminal case pyrshah ïa ki san ngut ki nongtrei ka Jowai District Jail kiba kynthup ïa u Rajesh Swer (head warden), u Champmilan Kynjing (warder), u Damelahun Sun (temporary warder), u Pyndaphor Bamaon (warder) bad u Alexier Lamtam (temporary warder) hadien ka jinglait phet jong ki san ngut ki runar ba dang shah tian bishar bad uwei u koidi na District Prison and Correctional Services, Jowai ha ka 10 tarik mynta u bnai.
Ka jingtohkit ba malu mala ka lap ba ïa ka District Prison Jowai la pynïakhlad ha ki lai tylli ki bynta (security perimeters)
ha kaba ïa ka khyrdop banyngkong bad ka khyrdop ban mih shabar la pahara da ki Pulit jong ka 6th MLP Bn bad ïa ka khyrdop ba ar bad ba lai la pahara da ki nongtrei jong ka Phatok.
U Bah Rymbui u la ïathuh ba ha ka por kumba 1.45 baje jong ka 10 tarik u Nailur, katba u Warden u dang rung sha ka khyrdop kaba lai, u la shah thombor bad shah pynbor ban plie ïa ka khyrdop kaba lai hadien ba u nongap ïa ka khyrdop kaba lai u la shah thombor bad kumjuh ruh ha ka khyrdop kaba ar.
Ynda la poi ha ka khyrdop kaba nyngkong ban mih shabar, ïa kaba la pahara da u Pulit jong ka 6th MLP Bn, une u Pulit u la pyrshang ban pynsangeh ïa kine ki runar da kaba siat shi kuli sha suiñ.
Hynrei, une u Pulit u la shah tangon da ka tiar kaba nep na khlieh bad ki runar ki la thombom ïa u bad ïohlad ban mih shabar jong ka khyrdop.
Ha kane ka jingjia, saw ngut ki nongtrei jong ka Phatok bad uwei u Pulit ki la mynsaw bad ïa une u Pulit la pynkit noh mardor sha Hospital ban ïoh jingsumar, la ong u Bah Rymbui.
Tang hadien kane ka jingjia, la phah jingtip sha baroh ki Police Unit ha ka District bad la pynlong ruh ka jingthwet kaba jur da ki Pulit.
Ïa ka jingpyntip la phah ruh sha u Special Superintendent of Oolice (CID), ban pyntip sha baroh ki Police Station jong ki District.