Da ka lynti ka aiñ byrngem u MDC ka BJP na Tura lada ym lah pynshai halor ka jinglum khajna ha GHADC

Shillong, Naitung 14 : U MDC ka BJP na Tura u Bernard N Marak u la byrngem ban ïaid da ka lynti jong ka ain lada ka Garo Hills Autonomous District Council (GHADC) kam lah ban pynshai hapoh shiphew sngi halor ka jingkynnoh ban pyntreikam ïa ka khajna khlem da ïoh shwa ka jingmynjur jong u Lat, kumba la kdew katkum ka Khyrnit kaba Hynriew jong ka Riti Synshar ka ri India.

Ha ka shithi sha u Executive Member jong ka Council u Grahambell A Sangma, na ka liang u Bernard u la buh jingkylli ïa kito kiba ka tnad ka bteng ban shim khajna khamtam eh ïa ki riewlum da kaba ong khlem da ïoh shwa ïa ka jingmynjur  katkum ka riti synshar ka ri.

U Bernard u la kynnoh ba ka rukom lum khajna ka long kaba be-aiñ,  bad kaba long pyrshah ïa ka riti synshar ka ri, khamtam haba kam pat ïoh ïa ka jingmynjur jong u Lat.

U la ong ruh ba ka GHADC kam shym la lah ban siew ïa ka tulop kaba sahkut palat 40 bnai jong ki nongtrei jong ka, wat la ka lum khajna lyngba ki khajna ki bym pat ïoh jingbit ban lum.

Halor kane, u Bernard u la dawa na ka EC ba mynta ban pynshai mardor halor ka nongrim katkum ka ain haba ïadei bad katei ka jinglum khajna khlem ka jingmynjur jong u Lat.

U la buh jingkylli ba kumno u Executive Member un lait na kaba shah pynngat ha ka ain namar ba u la pynkhein ïa ki kyndon jong ka riti synshar. U ong kaei ka jingpynshisha ban lum khajna khlem jingbit katba ki nongtrei ki dang sah khlem pat ïoh ïa ka tulop la slem slem bha.

U ong ruh ba lada ka Council kam lah ban ai ïa ka jubab kaba biang hapoh 10 sngi, u Bernard u la byrngem ban ïaid ki kyndon aiñ, kaba lah ban wanrah ïa ka jingwan tuklar jong ka ïingbishar ban pynthikna ba ka GHADC kan treikam hapoh ka riti synshar ka ri.

“Lada ym shym la ai ïa ka jubab kaba sngewhun hapoh 10 sngi, ngan hap ban bud ïa ki kyndon aiñ ban pynngat ïa phi ha ka jingkitkhlieh na ka bynta kine ki jingpynkheiñ. Ka jingbteng ban lum ïa ki khajna be-aiñ bad ka jingpynïaid be-aiñ ïa ka pisa kam lah ban ïaid khlem da khmih bniah. Nga khmih lynti ïa ka jubab kaba kloi kaba pynbeit ïa kine ki jingeh lym kumta, kan hap ha ka jingtuklar jong ki bor ka ain ban pyntikna ba ka GHADC kan treikam katkum ka  riti synshar. Sngewbha ban leh kyrkieh ïa kane ka kam,” u la ong ha ka shithi.