Da ka lynti ba jaijai yn hiar ka Regional Committee sha Langpih Sector ban ïa pynbeit u pud u sam

Nongstoiñ, Risaw 14: Ka jingïalang jong ka Regional Committee ha West Khasi Hills District na ka bynta ki kam pynbeit pud, ba la khlieh da u bah Renikton Lyngdoh Tongkhar, kaba la pynlong mynta ka sngi ha Trysem Hall jong ka DC ophis Nongstoiñ, ka la shim ïa ka rai ban leit ïakynduh ïa ki paidbah ka thaiñ Langpih da ka lynti kaba suk bad kaba jai jai.
Kane ka rai ka la mih hadien ba ka Committee ka la ïashong ïatai haduh palat lai kynta ha kaba la don ryngkat da ki nongïalam Hima, ki nongïalam shnong ka thaiñ Langpih bad kumjuh ruh ki Sengbhalang bapher bapher kiba dei napoh ka West Khasi Hills District.
Na ka liang u bah Renikton Lyngdoh Tongkhar haba ïakren sha ki lad pathai khubor hadien ba la wai katei ka jingïalang, u la ong ba kane ka rai ban leit sha ki paidbah ka thaiñ kan long da ka lynti kaba suk ba saiñ, ka ban long ruh ban ïasngewthuh bad ki paidbah, khnang ba kan mym mih kano kano ka jingpyrshah ne ki jingklumar ynda ka jingïapynbeit pud ka la ïaid.
U la ong ba ka sorkar bad ki paidbah hi ki kwah ba ka Jylla Meghalaya kan ïoh ïa u pud u sam ym dei da ka jingïaum snam hynrei da ka lynti jong ka jingsuk. Ha kaba ïadei pat bad ka jingleit jurip ïa ka thaiñ Langpih, na ka liang jong u bah Renik u ong ba ka committee kan sa shong ban ïa pynbeit lano kan hiar ban pynlong ïa ka jingjurip, khnang ba kan ïoh sngap ïa ka jingsngew jong ki paidbah ba bun balang, khnang ba ka jingpynbeit pud kan long kaba ai jinghun.
Ha kajuh ka por u la ong ba kaba kongsan eh ka long ka jingïa jurip lang da ka committee ha ryngkat ka committee na Assam bad ïa kane ruh ym pat lah ban tip namar hap ban ap lang ïa ka committee na Assam lyngba u chairman. U la ïathuh ruh ba ka committee ka la pule ruh ïa ka thup kyrteng jong ki 53 tylli ki shnong ba la mynjur da ka sorkar Jylla ha u snem 2011.
Lyngba kane jingïalang ka committee ka la pyrshang ban peit thuh bha ïa ka jingdon jong kito ki shnong, ha kaba la lap ba ki don ki shnong ki bym don shuh mynta bad ïa kane la pyntikna ruh da ki bor pynïaid District ka West Khasi Hills kiba la leit ban wad ban pyntikna.
Nalor nangta u la ong ruh ba ki don pat ki katto katne tylli ki shnong kiba don ha syndah bad kitei ki shnong, kiba la paw ha ka list jong ki 53 tylli ki shnong, ki bym shym la shah kynthup lang ha katei ka thup. Lehse ka lah ban dei kajuh ka shnong tangba la pynkylla kyrteng bad ïakum kita ki shnong yn hap ban bishar bniah.
“Na ka liang jong ka committee kan sa bishar bniah lyngba ki GPS ïa kiba kum kita ki shnong kiba don mynta bad ki bym shah kynthup ha la thup jong u 2011. Lada kita ki shnong hap hi ha kato ka thaiñ, kan nym don jingeh eiei ruh em ban ïa pynbeit”, u la ong.